Shuhet në moshën 74-vjeçare skenaristi dhe regjisori i njohur Kujtim Gjonaj

Feb 28, 2021 | 19:31
SHPËRNDAJE

kujtim gjonajËshtë ndarë nga jeta skenaristi dhe regjisori i mirënjohur Kujtim Gjonaj. Mësohet se ai u nda nga jeta sot në moshën 74 vjeçare.

Në një reagim, Shoqata e Botuesve Shqiptare thotë se Gjonaj ka dhene një kontribut me vlerë në pasurimin e bibliotekës shqiptare me autorë të shquar.

“Sot u nda nga jeta Kujtim Gjonaj, skenarist e regjisor i filmit dokumentar nga më të njohurit, por edhe një nga botuesit e rëndësishëm të librit. Si themelues i Shtëpisë Botuese “Bota Shqiptare” ai ka sjellë një kontribut me vlerë në pasurimin e bibliotekës shqiptare me autorë të shquar. Kujtimin do e kujtojmë për të gjitha punët e mira që ka bërë, por edhe si një mik e koleg shumë të dashur, bashkëpunues e përherë buzagaz e me fjalë të ngrohta. Të qoftë dheu i lehtë, mik e koleg i paharruar!”
JETA E REGJISORIT

Kujtim Gjonaj ka qenë skenarist, regjisor i filmave dokumentarë dhe vizatimorë, producent dhe botues. Ai ka lindur në 13 nëntor të vitit 1946 në qytetin e Tiranës.

Në vitin 1968 mbaroi studimet e larta në Universitetin e Tiranës Dega Gjuhë – Letërsi dhe po atë vit fillon punën si redaktor i skenarëve të filmave dokumentarë në Kinostudion “Shqipëria e Re”.

Në vitin 1974 kalon si regjisor në sektorin e filmave dokumentarë duke shkruar edhe shumë nga skenarët e këtyre filmave.

Veprimtaria e Kujtim Gjonajt

Në vitin 1982 do të nderohet me Çmimin e II-të në Konkursin Kombëtar Letraro – Artistik për Skenarin për skenarin e filmit “Kryengritjet e Mëdha”, në vitin 1986 filmi “Më e madhja dashuri” do të vlerësohej si filmi më i mirë i vitit, në 23 prill të vitit 1990 filmi “Kështjella e Këngëve” do të vlerësohej me Kupën e Festivalit në Festivalin e VIII-të të Filmit Dokumentar dhe Vizatimor Shqiptar, në vitin 1995 filmi “Shembja e idhujve” do të vlerësohej me Çmimin e I-rë në Festivalin Ndërkombëtar të Filmit të shkurtër në Palermo (Palermo Film Festival), në vitin 1998 do të vlerësohej gjithashtu me Çmimin e I-rë në Konkursin e V-të Ndërkombëtar të Mesdheut të Filmit Dokumentar dhe Reportazhit (Premio Internazionale del Documentario e del Reportage Mediterraneo).

Në filmin artistik ai ka shkruar katër skenarë, përmendim këtu skenarin e filmit “Thirrja” që do të ishte dhe skenari i tij i parë në filmin artistik në vitin 1976, filmat “Ata ishin katër” dhe “Cirku në fshat” në vitin 1977, filmin “Këshilltarët” në vitin 1979. Pas viteve 90’ Kujtim Gjonaj ka qenë për një kohë Drejtor i Alba Filmit dhe më pas krijoi një shtëpi prodhuese filmike, “Bota Shqiptare”, ndërmjet të cilës vazhdon krijimtarinë e tij profesionale.

Kjo shtëpi prodhuese është edhe një shtëpi botimi ma anë të së cilës botuesi Gjonaj prodhon biografitë e figurave të shquara të kombit si Ali Pasha Tepelenën, Faik Konica, Jeronim De Rada, Naim Frashëri, Nënë Tereza, Sulejman Pitarka (Artist i Popullit)), etj. Këto biografi i shërbejnë më pas si bazë për skenarët e filmave dokumentarë mbi këto figura. Me dokumentarin “Enciklopedi që ecën më këmbë”, Kujtim Gjonaj do të vlerësohej me Kupën e Festivalit në Festivalin e XII-të të Filmit Dokumentar Shqiptar të mbajtur në Tiranë në vitin 2006.

© Panorama.al

Te lidhura


Subscribe

      
             

Për t’u bërë pjesë e grupit të "Panorama" mjafton të klikoni: Join Group dhe kërkesa do t’ju aprovohet.
KOMUNITETI PANORAMA ONLINE: https://facebook.com/groups/panoramaonline/

 

1 KOMENT

  1. Me trishtoi sa s'ka lajmi per ndarjen nga kjo jete e shokut tim te kursit ne universitet, Kujtim Gjonaj e me pas te komunikimeve qe kemi patur, edhe pse te rralla, ai duke jetuar e punuar ne Tirane e une ne nje tjeter qytet. Qe kerkues, vizionar, punetor i palodhur. Kultura shqiptare e ne vecanti kinematografia shqiptare humben nje tjeter emer te pervecem. I perjetshem qofte kujtimi i tij!

Comments are closed.