Partia Demokratike shprehu shqetësimin për procesin e vetingut duke akuzuar se me diktimin e Kryeministrit Rama, po mbahen në sistem gjyqtarë e prokurorë të korruptuar.
Këtë herë, PD denoncoi rastin e Brikena Ukperaj, gjyqtarja e Apelit në Vlorë. Sipas Ina Zhupës, zëdhënëse e PD-së, ky është një nga rastet kur vetingu ka vepruar me dy standarde, duke ligjëruar pasuri të pajustifikuara të gjyqtares.
“Mosjustifikimi dhe mungesa e një hetimi të thelluar nga organet e vettingut për një shtëpi në emër të bashkëshortit. Problemet për blerjen e një automjeti, për të cilin organet e vetingut nuk hetuan me vëmendje, si dhe mosverifikimi i plotë i ankimit të familjes Bodo kundër vendimit të dyshimtë për aferën e 200 hektarëve tokë në Karaburun që favorizoi deputetin socialist Fidel Ylli. Këto janë tre pikat e errëta të vendimit të organeve të vetingut, që po mban në sistemin e drejtësisë gjyqtarë të korruptuar”, tha Zhupa.
Sipas saj, arsyeja përse Brikena Ukperaj ka kaluar shkallën e parë të vetingut, shpjegohet me skemën e Edi Ramës për të kontrolluar Këshillin e Lartë Gjyqësor.
Brikena Ukperaj është person kyç në skemën e Edi Ramës, dhe po nxitet prej tij të aplikojë për ta zgjedhur anëtarë të Këshillit të Lartë Gjyqësor, tha Zhupa nga selia blu.
“Me shumë gjasë, gjyqtarja e Apelit të Vlorës, me pasuri të pajustifikuar, por e konfirmuar në detyrë, do të mbetet e vetmja kandidate potenciale për në KLGJ, duke qenë kështu një kamikaze në këtë Këshill dhe zbatuese e qartë e skemës së Edi Ramës për të kapur sistemin gjyqësorë, veçanërisht Gjykatën Antikorrupsion. Me një gjyqtare lehtësisht të shantazhueshme për pasuritë e pajustifikuara dhe vendimet e dyshimta, Edi Rama e ka më të lehtë kapjen e Këshillit të Lartë Gjyqësor akoma pa u ngritur, duke e shndërruar reformën në drejtësi në një farsë politike dhe duke shuar shpresat e shqiptarëve për një drejtësi që ndëshkon politikanët e korruptuar dhe të lidhur me krimin e organizuar.”
NDIQE LIVE "PANORAMA TV" © Panorama.al
