Në Britani ka nisur procesi gjyqësor për vrasjen e të riut shqiptar, Serxhio Marku. Një juri e gjerë do të dëgjojë në gjyq provat kundër dy burrave italianë të akuzuar për vrasjen.
Giuseppe Petriccione dhe Francesco D’Agostino pretendohet se kanë vrarë Markun në Brighton më 11 shtator të vitit të kaluar.
Marku, 21-vjeçar, pësoi dëmtime kritike dhe u dërgua me urgjencë në Spitalin Royal County Sussex, por vdiq atë ditë më vonë.
Një kordon i gjerë policor u vendos në Stafford Road dhe në rrugët fqinje ndërsa oficerët shkuan derë më derë për të folur me fqinjët për të marrë dëshmi, ndërsa nisi operacioni “Barnfield”.
Tani, italianët Petriccione, 46 vjeç dhe D’Agostino, 45 vjeç, do të dalin në gjyq të akuzuar për vrasjen e Z. Marku. Një juri me tetë burra dhe katër gra u betuan për të dëgjuar çështjen në Brighton Crown Court, shkruajnë mediat lokale.
Gjatë seancës paraprake të zhvilluar sot, të dy burrat konfirmuan vetëm emrat e tyre në bankën e të akuzuarve. Gjykatësja Christine Laing u tha anëtarëve të rinj të jurisë se janë ndërmarrë hapa për t’i lejuar ata të qëndrojnë të sigurt ndërsa gjykimi vazhdon.
Ajo tha se gjyqi pritet të zgjasë katër javë dhe u tha juristëve se ishte në fakt një rigjykim, pasi gjyqi fillestar i cili kishte filluar në mars u anulua për shkak të krizës së koronavirusit. Ajo tha se të dy burrat italianë i mohojnë akuzat.
Serxhio Marku, 21 vjeç, u gjet gati i vdekur në kuzhinën e një banese në Brighton në 11 shtator, 2019. Marku, i njohur si Jack, ishte një tregtar droge u tha më vonë në gjykatë. Banesa ndahej nga dy italianët, të cilët punonin në një restorant në Brighton.
Alan Kent i tha gjykatës se skena ishte shumë e përgjakur. I riu, sipas tij, ishte goditur me thikë, një shtizë metalike dhe një shtangë.
Kent shpjegoi: “Lëndimet duhet të përcaktohen grafikisht sepse është e rëndësishme për ju të kuptoni llojin e ndryshëm të armëve të përdorura”
Ai përshkroi shtypje dore të përgjakshme rreth një kornize dere që sugjeronte që Marku po largohej nga ndërtesa ndërsa sulmuesit u përpoqën ta tërhiqnin përsëri brenda.
“Duke parë shpërndarjen e gjakut në pjesën e jashtme të asaj banese, ju mund të arrini në përfundimin që Serxhio Marku u përpoq të dilte dhe arriti në derën e përparme përpara se të tërhiqej përsëri brenda atje ku vazhdoi sulmi. Më shumë se një duzinë plagësh nga një objekt i mprehtë dhe mbi 20 dëmtime me forcë, u treguan pas rindërtimit kompjuterit të trupit të tij”, tha hetuesi.
Kent vuri në dukje se ky ishte një sulm i qëndrueshëm dhe i vendosur: “Lidhja midis Serxhio Markut dhe dy të pandehurve ishte droga, veçanërisht kokaina“.
Të pandehurit e kishin kontaktuar atë mbi njëqind herë në muajt para vdekjes së tij dhe tani fajësonin njëri-tjetrin për vrasjen. Z. Kent shpjegoi se është e panjohur pse ai u sulmua pothuajse menjëherë kur hyri në banesë.
Ai vazhdon: “Ajo që dimë nga të dhënat telefonike është se në orën 11.41 një mesazh me tekst u dërgua nga telefoni i D’Agostino.” Teksti u dërgua në italisht dhe u përkthye, ai thotë “Sonte do të bëj një vrasje“. Gjyqet vazhdojnë ndërsa të dy burrat mohojnë vrasjen. /S.Ll/
LEXO EDHE:
NDIQE LIVE "PANORAMA TV" © Panorama.al
