Nora, Era, Nita dhe Bledi Istrefi janë rritur pa babain e tyre, pasi 16 vite më parë, ai ndërroi jetë në një aksident.
Nora dhe Era e kujtojnë shpesh babain e tyre dhe kanë treguar se pavarësisht se vitet kalojnë, dhimbja për të nuk është zbehur kurrë.
Nezir Istrefi punonte si gazetar në televizionin e Prishtinës dhe ka qenë shumë i njohur në atë kohë.
Për këtë arsye, “Radio Televizioni i Kosovës” i ka kushtuar një emision të ndjerit për punën e tij.
Mbrëmjen e djeshme, në emisionin “Arkiv” ishte e ftuar bashkëshortja e Nezirit, Suzana Tahirsylaj.
Nora publikoi në Instastory një pjesë nga intervista, të cilën e ka ndjekur përmes televizionit.
“Mami në këtë intervistë shpjegon shumëçka për babin tonë! Vajzë krenare”, shkroi këngëtarja.
Nëna e motrave Istrefi zbuloi se është takuar me të ndjerin në vitin e katërt të shkollës së mesme, kohë gjatë së cilës për gjashtë muaj Neziri ishte profesori i saj. Megjithatë, ajo tha se e njihte edhe më parë, sepse ka qenë një figurë shumë e njohur.
“Fëmijët i ka dashur shumë. Ka arritur të shijojë një këngë të Norës në fillimet e saj. Ndërsa unë nuk kam qenë shumë pro që Nora t’i futej kësaj rruge, sepse si nënë më dukej shumë e vështirë. Ndërsa Neziri i ka mbështetur gjithmonë”,- rrëfeu Suzana për marrëdhënien e babait me fëmijët e tij.
“Mendoj se nga zëri i ngjan Era, ndërsa në dukje i ngjan Nora. Fëmijët e kujtojnë të gjithë, edhe Bledi, i cili në atë kohë ka qenë vetëm 3 vjeç”,- përfundoi ajo.
NDIQE LIVE "PANORAMA TV" © Panorama.al
