Është ndarë nga jeta në moshën 76-vjeçare, piktori Pandi Mele. Sipas një njoftimi nga Galeria Kombëtare e Arteve, artisti u shua pak ditë më parë në Shtetet e Bashkuara të Amerikës, për shkak të një sëmundjeje të rëndë. “Piktori i Merituar”, Pandi Mele, lindi në vitin 1939 në Korçë. Ndoqi Liceun Artistik në Tiranë për Pikturë, në drejtimin e pedagogëve Abdulla Cangonji, Sadik Kaceli, Qamil Grezda, Abdurrahim Buza, Kristina (Koljaka) Hoshi.
Studioi dy vite për Grafikë në Akademinë “I.E.Rjepin” në Shën Petërburg, Rusi në atelienë e S.M. Vasiljeviç dhe u diplomua në Tiranë në vitin 1964. Pandi Mele ka dhënë një kontribut të rëndësishëm si pedagog i Grafikës në Ish-Institutin e Lartë të Arteve, Tiranë, sot Universiteti i Arteve, duke drejtuar për shumë vite atelienë e grafikës. Ekspozoi për herë të parë në moshën 17-vjeçare “Portreti i gjyshes” (1956, GKA, Tiranë).
Pandi Mele ishte i pari artist grafist shqiptar, që aplikoi ciklet grafike (kompozime), duke u mbështetur në veprat letrare apo legjendat shqiptare (cikli “Motive Migjeniane” 1964 (GKA, Tiranë); serinë grafike “Shtypi i Partisë” 1984; cikli “Rozafa”, 1999, (studio e artistit). Një tjetër cikël grafik është ai për filmin dokumentar, që i kushtohet Gjergj Kastriotit Skënderbeut, kompozimi “Aleksandër Moisiu me Stanislavskin në Moskë” dhe “Nënë Tereza”.
Këtyre veprave tani së fundi i shtohet edhe portreti i Presidentit të Shteteve të Bashkuara të Amerikës, Barak Obamës. Mele vazhdoi traditën e grafikës shqiptare (në linoleum) të filluar nga piktori Sadik Kaceli, duke e modernizuar atë edhe në teknika të tjera, si litografi, akuaforte, gdhendje në dru. Me veprën e tij, Pandi Mele ndikoi dukshëm në realizimin e një grafike bashkëkohore, si në teknikë, ashtu dhe në konceptimin e saj. Piktori Pandi Mele është autor i shumë pllakateve, emblemave, pullave postare, apo ilustrimeve të ndryshme për veprat e shkrimtarëve shqiptarë.
Në pikturë, ai ka realizuar tablo kompozicionale me temën e jetës shqiptare të periudhës së socializmit. Mele ka qenë pjesëmarrës në ekspozitat jashtë Shqipërisë deri në vitet 1990, si Greqi, Kosovë, Jugosllavi, Rumani, Turqi, Itali, Francë, Austri, Bienale – Egjipt, Kinë. Mele ishte i ftuar në Bienalet dhe Trienalet Ndërkombëtare të grafikës nga viti 1989–1999 në Europë dhe Lindjen e Largët.
Është gjithashtu autor i shumë artikujve në shtypin e kohës mbi zhvillimin e grafikës, dizajnit dhe arteve figurative shqiptare. Në fondin e Galerisë Kombëtare të arteve ruhet një koleksion prej 54 veprash në pikturë, grafikë e vizatim.
NDIQE LIVE "PANORAMA TV" © Panorama.al