Komuniteti Mysliman i Shqipërisë ka njoftuar të gjithë besimtarët myslimanë se namazi i Fitër Bajramit këtë vit do të falet nëpër xhamia sipas masave dhe protokollit të përcaktuar.
“Duke vlerësuar situatën dhe ecurinë e zhvillimeve të fundit mbi përhapjen e Covid-19 në Shqipëri, KMSH bën me dije se namazi i Fitër Bajramit këtë vit do të falet nëpër xhamia sipas masave dhe protokollit të publikuar më parë,”- njoftoi KMSH.
Ceremonia qendore e Fitër Bajramit, ku do të jetë i pranishëm edhe kryetari i KMSH, Bujar Spahiu, do të zhvillohet në xhaminë e “Kokonozit” në Pazari e Ri në Tiranë ditën e dielë.
“Nesër është Fitër Bajrami dhe me këtë rast i uroj të gjithë besimtarët myslimanë shqiptarë kudo që ndodhen, gëzuar e për shumë vjet. Paqe, lumturi dhe harmoni sjelltë bajrami në familjet tuaja!
Fitër Bajrami është kurorëzimi i muajit të Ramazanit, është ftesa e shpalosjes së vlerave të fituara në këtë muaj, është shpërblimi i sakrificës, është afrimi më shumë me Zotin. Bajrami është ditë shprese, gëzimi dhe solidarizimi, është dita e manifestimit të vlerave dhe virtyteve që Ramazani i ka rizgjuar tek njeriu, është dita e falënderimeve dhe dita e dashurisë.
Këtë muaj e përjetuam ndryshe nga Ramazanet e tjera, u privuam nga namazet e përbashkëta, iftaret dhe festimet me të dashurit. Por falë Zotit ky Bajram vjen në një situatë më të përmirësuar,”- uroi Bujar Spahiu.
Ndërsa drejtoi edhe një mesazh për mjekët: “Me këtë rast dua të falënderoj në mënyrë të veçantë të gjithë punonjësit e shëndetësisë, që punuan me përkushtim për të mbrojtur jetën dhe shëndetin e qytetarëve të prekur nga pandemia.
Në një hadith kudsi Allahu u drejtohet besimtarëve: “Për Mua agjëruat në muajin e Ramazanit dhe sipas urdhërit tim falët namazin e bajramit. Kthehuni tani në shtëpitë tuaja të pastruar nga gjynahet e të falur”.
Allahu ua pranoftë agjërimin, adhurimet dhe lutjet që kemi bërë gjatë këtij muaji të bekuar.
Rama izolon vendin
Ndërkohë kryeministri Edi Rama ka rikthyer në fuqi ditën e djeshme urdhërin që njerëzit të izolohen në shtëpi gjatë fundjavës.
Pavarësisht lehtësimit thuajse të plotë të masave kundër koronavirusit, e diela u mbyll sërish.
Vendimi i papritur i kryeministrit Rama u lajmërua shkurtimisht në Facebook dhe vlen për zonat të cilat konsiderohen ende të kuqe për shkak të koronavirusit.
Festa është kulmi i një muaji agjërimi, i cili mbyllet zakonisht me lutje të përbashkëta mëngjesin e ditës pas mbylljes së muajit të shenjtë të Ramazanit.
NDIQE LIVE "PANORAMA TV" © Panorama.al
