Muxhahedinët, Rama: Presim të vijnë 1900 brenda vitit 2016

SHPËRNDAJE

Kryeministri Edi Rama, përmes një shkrese zyrtare i është përgjigjur interesit të nënkryetarit të Komisionit të Sigurisë, Flamur Noka, për çështjen e muxhahedinëve. Letra është dërguar nga Kryeministri më 22 prill të këtij viti dhe sqaron angazhimin e qeverisë për t’i dalë në krah Shteteve të Bashkuara të Amerikës për të zhvendosur anëtarët e komunitetit iranian që jetonin në Irak.

Muxhahedinet-1Në letrën sqaruese, kreu i qeverisë bën me dije se numri i muxhahedinëve të ardhur nga viti 2013 e deri më tani shkon në 1001 anëtarë, ndërkohë që sipas pritshmërive të qeverisë, brenda vitit 2016 pritet të vijnë edhe 1900 muxhahedinë të tjerë. Gjatë letrës së tij, kreu i qeverisë jep edhe detaje lidhur me pranimin e këtyre grupeve dhe bashkëpunimi me organizatat partnere. Sipas Ramës, shtetasit iranianë kanë ardhur në grupe të përbërë nga 20-120 persona dhe aktualisht gjenden të strehuar në banesa kolektive. Pas hyrjes së muxhahedinëve, qeveria ka vënë në dijeni menjëherë Shërbimin Informativ Shtetëror. Qeveria garanton se të gjithë personat e këtij komuniteti të ardhur në Shqipëri, janë integruar më së miri, kanë mësuar gjuhën dhe disa prej tyre kanë filluar edhe punë.

LETRA

I nderuar zoti Noka,

Siç besoj se jeni në dijeni, edhe për shkak të detyrës që ju keni mbajtur gjatë mandatit të qeverisë së mëparshme, vendi ynë ka pasur një angazhim të kahershëm për të gjetur një zgjidhje për çështjen MEK.

Duke pasur parasysh kushtet ekstreme dhe situatën e tensionuar që rrezikonte jetën e një komuniteti shtetasish iranianë, anëtarë të organizatës MEK që jetonin në Irak, Qeveria shqiptare e gjykoi të udhës të vendosej në krah të aleatit tonë strategjik, Shteteve të Bashkuara të Amerikës, për të ndihmuar në evakuimin urgjent të këtij komuniteti nga Iraku, përkohësisht drejt Shqipërisë.

Nga viti 2013 e deri më sot, numri i personave të ardhur në Shqipëri është 1001, ndërkohë që sipas pritshmërive tona do të jenë edhe 1900 persona të tjerë që do të mbërrijnë brenda vitit 2016.

Ata kanë ardhur në grupe të vogla, të përbërë nga 20 deri në 120 vetë dhe aktualisht janë strehuar në banesa kolektive në periferi të Tiranës. Të gjithë këta persona, pjesë e organizatës MEK, vetëfincohen, ndërsa autoritetet shqiptare janë në bashkëpunim të ngushtë me organizata të ndryshme ndërkombëtare, si UNHCR, IOM apo RMSA. Në momentin që këta qytetarë hyjnë në territorin e Republikës së Shqipërisë, autoritetet informojnë Shërbimin Informativ Shtetëror dhe Policinë e Shtetit.

Këto institucione informohen edhe për çdo lëvizje tjetër të anëtarëve të MEK apo për ndryshime të mundshme të adresës së qëndrimit në Shqipëri. Deri më sot, vetëm një prej këtyre qytetarëve është larguar drejt Francës, sigurisht i regjistruar në sistemin TIMS, i pajisur me leje kalimi. Ministria e Punëve të Brendshme nuk ka lëshuar asnjë dokument udhëtimi për këta qytetarë.

Ndërkohë, çdo anëtar i organizatës MEK i ardhur në Shqipëri është pajisur me leje qëndrimi, si dhe kartë shëndetësore. Secili prej personave të mbërritur deri më tani në vendin tonë është marrë mbi baza humanitare dhe do të trajtohet sipas kuadrit ligjor në fuqi.

Deri më sot, asnjë prej qytetarëve anëtarë të MEK nuk ka aplikuar për nënshtetësi shqiptare. Dëshiroj t’ju informoj se qeveria shqiptare ka marrë të gjitha masat e nevojshme, në bashkëpunim të ngushtë me partnerët tanë të huaj, për të qenë në lartësinë e duhur në këtë operacion humanitar të rëndësishëm.

Vlen të theksohet se deri më sot, 1001 qytetarët e ardhur në vendin tonë janë integruar më së miri në komunitet, duke mos shënuar asnjë lloj incidenti serioz. Ata kanë mësuar gjuhën shqipe dhe disa prej tyre kanë filluar punë.

Duke ju falënderuar për interesimin tuaj,

Edi Rama

 

 

Te lidhura


Për t’u bërë pjesë e grupit të "Panorama" mjafton të klikoni: Join Group dhe kërkesa do t’ju aprovohet.
KOMUNITETI PANORAMA ONLINE: https://facebook.com/groups/panoramaonline/

S'KA KOMENTE

Comments are closed.