Politologu Fitim Zekthi, ka komentuar investigimin e emisionit ‘Report’ në median italiane RAI3, për marrëveshjen Rama-Meloni për emigrantët, ku Sekretari i Përgjithshëm i Këshillit të Ministrave, Engjëll Agaçi, del si personazh kyç i kësaj marrëveshjeje, ndërsa cilësohet dhe si ‘avokat i narkotrafikantëve’.
Zekthi u shpreh se kronika e RAI3 nuk sulmon Shqipërinë, por korrupsionin e qeverisë, ndërsa theksoi se kryeministri Edi Rama po përpiqet ta kthejë në çështje sikur sulmohet vendi.
Sipas tij Rama ka një problem të madh me këtë rast, pasi “ka dirigjuar vetë gjithë propagandën dhe ka ndërtuar aureolën e një njeriu që merret me gjëra të mëdha”.
“Kronika nuk sulmon Shqipërinë, por korrupsionin e qeverisë shqiptare. Këtë e vendos gjykata. Por që ky ta kthejë në çështje sikur sulmohet Shqipëria, është tipar i një lideri autoritar. Gebëlsi thoshte se gjërat nuk ishin kundër Hitlerit, por kundër ardhmërisë së Gjermanisë. Si kryeministër duhet të jesh transparent.
Në Spanjë dyshohet se gruaja e kryeministrit ka kryer korrupsion. Ai tha se beson se gruaja e tij është e pafajshme dhe ka ngrirë funksionet dhe ka konsideruar të heqë dorë nga pushteti pas lajmit në dy portale, jo televizione kombëtare. Rama ka një problem shumë të madh, e ka dirigjuar gjithë propagandën vetë me dorë duke u marrë me të gjitha. Ka ndërtuar aureolën e një njeriu që merret me gjëra të mëdha dhe se ky nuk merret me korrupsion”, u shpreh ai.
NDIQE LIVE "PANORAMA TV" © Panorama.al
