Një lajm i trishtë erdhi sot nga bota e artit, ku vallëtarja Liljana Cingu, u nda nga jeta në moshën 74-vjeçare.
Në lidhje me ndarjen nga jeta të artistes me titull “Nderi i Kombit”., kanë reaguar edhe drejtuesit më të lartë të shtetit shqiptar.
Presidenti Bajram Begaj shkruan në Facebook se Liljana Cingu do të mbetet në kujtesën e shqiptarëve si ikona e valles shqipe.
“Artistja Liljana Cingu “Nderi i Kombit” do të mbetet në kujtesën e shqiptarëve si ikona e valles shqipe.”, shkruan Begaj.
Ndërsa kryeministri Edi Rama shkruan në rrjetet sociale se me ikjen e artistes, froni i mbretëreshës së valles shqiptare mbetet bosh.
“?LAMTUMIRË
Ikja e Lili Cingut lë zbrazur fronin e mbretëreshës së valles shqiptare?
U prehtë në paqe?”, shkruan kryeministri.
Po ashtu edhe kryeparlamentarja Lindita Nikolla ka reaguar për vdekjen e valltares. Nikolla përmes një postimi në rrjetet sociale, nënvizon se vallet Liljana Cingu i bëri që të duken më të lehta dhe plot bukuri e hijeshi.
“Lamtumirë, Lili Cingu, mbretëresha e valleve shqiptare!?
Vallet e Jugut, Çamërisë, Korçës, Kolonjës, Shqipërisë së Mesme, vallet epike të Veriut, vallet e Dropullit dhe krahinave të tjera të Shqipërisë i bëre më të lehta dhe u dhe plot bukuri e hijeshi me kërcimin tënd!”, thuhet në postimin e Nikollës.
Edhe kryetari i Partisë së Lirisë, Ilir Meta tha se ndarja nga jeta e Liliana Cingut është një lajm trishtues. Meta theksoi se kontributi i saj do të mbetet gjithmonë i paharruar.
“Trishtues lajmi për ndarjen nga jeta të artistes tonë të madhe Liliana Cungu, “Nderi i Kombit”, njërës prej emblemave të jashtëzakonshme të artit dhe kulturës.
Falë mjeshtërisë së rrallë në interpretimin e valleve shqiptare, kontributi i saj i vyer për promovimin e denjë të vlerave të trashëgimisë tonë të pasur kulturore dhe përçimi i tyre tek brezat e artistëve të rinj do të mbetet gjithmonë i respektuar, frymëzues dhe i paharruar. Ngushëllime familjes dhe komunitetit të artistëve”, shkruan Meta.