Një karton vezësh dhe perime gjysmë të përgatitura u gjetën në banakun e kuzhinës në shtëpinë periferike të familjes McStay. Dy kupa kokoshka të vogla ishin në divan dhe dy qentë e tyre ishin rreth e rrotull në oborrin e shtëpisë.
Por nuk pati asnjë shenjë të çiftit Joseph dhe Summer dhe as të dy fëmijëve të tyre të vegjël Gianni, 4 vjeç dhe Joseph Jr, 3 vjeç. Ishte e qartë që ata nuk kishin qenë atje për disa ditë, dhe të afërmit nuk kishin dëgjuar asgjë për ta. Dukej sikur familja McStay thjesht ishte ngritur në këmbë dhe ishte larguar … por pse?
Ishte shkurt 2010 – Joseph, 40 vjeç dhe Summer, 43 vjeçe, kur ishin zhvendosur në shtëpinë e tyre në Fallbrook, California, katër muaj më parë.
Joseph drejtoi një biznes të suksesshëm ujëvarash dekorative me bashkëpunëtorin Charles Merritt, ndërsa gruaja ishte agjente e pasurive të patundshme dhe nëna e përkushtuar. Ata punuan shumë dhe rritën fëmijët e tyre me shumë dashuri.
Më 15 shkurt 2010, familjarët e shqetësuar vizituan shtëpinë e Joseph dhe Summer, pasi ata nuk kishin dëgjuar prej tyre. Nuk kishte asnjë shenjë të familjes dhe me ushqimin e mbetur, dhe qentë në oborr, dukej sikur ata do të ktheheshin çdo minutë- por ata ishin zhdukur.
Hera e fundit që ishin parë ishte data 4 shkurt kur Joseph ishte takuar me Merritt – ai ishte gjithashtu personi i fundit që kishte thirrur në telefon. Nuk kishte asnjë shenjë të hyrjes me forcë ose ndonjë shenjë se ishte kryer një krim ose kishte ndodhur një përleshje. Familja u shpall e zhdukur.
Menjëherë pas kësaj, makina e familjes u zbulua e parkuar në një qendër tregtare pranë kufirit SHBA-Meksikë dhe kamerat e sigurisë treguan një familje me pamje të ngjashme duke ecur drejt kufirit meksikan.
Në kompjuterin e tyre, hetuesit gjetën kërkime për llojin e dokumenteve që fëmijët mund të kenë nevojë për të udhëtuar nëpër Meksikë, dhe dukej sikur dikush kishte bërë kërkime në gjuhën spanjolle (meksikanët flasin spanjisht). A ishin zhdukur ata vullnetarisht për të filluar një jetë të re në Meksikë? Askush nuk mund të dilte me ndonjë arsye përfundimtare.
Ata nuk kishin marrë asgjë nga gjërat e tyre dhe kishin mbi 100,000 dollarë të paprekura në llogarinë bankare. Hetuesit u hutuan dhe të afërmit e familjes u shqetësuan edhe më shumë.
Nëna e Joseph, Susan Blake, e ndihmoi Merritt të hynte në llogari për të vazhduar biznesin, por ndërmarrja nuk mund të punonte pa Joseph në krye.
Susan dërgoi emaile të birit duke i lutur që të lidhej. “Më telefono“, shkroi ajo. “Unë do t’ju ndihmoj.”
Askush nuk kishte një të dhënë nëse familja kishte fshehur diçka për të cilën shqetësoheshin dhe për tre vjet, zhdukja e tyre ishte një mister i plotë.
Rasti u përfshi në emisione televizive dhe kishte kaq shumë teori. Merritt madje filloi të shkruante një libër në lidhje me të – në fund të fundit, ai kishte qenë personi i fundit që kishte parë Joseph-in ditën kur u zhduk, ku ata dyshohet se kishin biseduar për biznesin përreth një orë.
Në libër, Merritt planifikoi të zbulojë se Joseph kishte biseduar me të dhe i kishte treguar se si bashkëshortja e tij ishte përpjekur ta helmonte. Ishte një sugjerim i pazakontë që askush tjetër nuk besonte se ishte e vërtetë.
Hetuesit kishin dyshimet e tyre në lidhje me bashkëpunëtorin. Në një intervistë menjëherë pas zhdukjes, ai iu referua Joseph-t në kohën e shkuar duke thënë “ai ishte shoku im më i mirë”, megjithëse nuk kishte prova se ai kishte vdekur.
Miqtë e Joseph thanë se Merritt bënte punë “të pista” dhe dyshonin se përfitonte para nga llogaria e tij.
Ishte një partner tjetër biznesi, Daniel Kavanaugh, i cili i tha policisë se Joseph mendonte për nxjerrjen e Merritt nga biznesi pasi luante kumar dhe kishte krijuar borxhe. Së bashku me faturat e papaguara të taksave, ai kishte krijuar një borxh prej 30,000 dollarë.
Më 11 nëntor 2013, një motoçiklist po udhëtonte nëpër shkretëtirën e Mojave të Qarkut San Bernardino – rreth një orë larg shtëpisë së familje dhe hasi në një skelet njerëzor i mbetur gjysmë jashtë dheut.
Policia zbuloi dy varre të cekëta. Familja McStay ishte gjetur përfundimisht. Eshtrat e Joseph ishin varrosur me të birin më të vogël, ndërsa gruaja dhe djali tjetër ishin më tej.
Të gjithë ata kishin fraktura të kafkës. Hetuesit përcaktuan se Joseph dhe Summer ishin vrarë fillimisht, ndërsa djemtë më pas nga frika se mund të identifikonin vrasësin. Banorët vendas vendosën kryqe në vendin e ngjarjes në kujtim të familjes, eshtrat e së cilës ishin përdhosur nga kafshët e egra.
Pas tre vitesh duke shpresuar se do të gjendeshin, fati i familjes McStay ishte zbuluar. Po kush i kishte vrarë ata? Ata nuk dukej se kishin një armik në botë.
Fokusi u kthye përsëri te Charles Merritt. Policia zbuloi se telefoni celular që i përkiste Merritt ishte afër vendndodhjes së varreve më 6 shkurt 2010, herën e fundit ku familja ishte parë.
ADN-ja e tij u gjet në makinën e familje që ishte braktisur afër kufirit meksikan për ta bërë atë të duket sikur ata e kishin lënë vetë.
Pavarësisht se provat ishin kryesisht rrethanore, Merritt u arrestua në vitin 2014 dhe u akuzua për vrasjen e Joseph, Summer dhe dy fëmijëve të tyre. Gjyqi u vonua vazhdimisht pasi Merritt “përjashtoi” disa avokatë dhe madje u përpoq të përfaqësohej vetë.
Më në fund, në vitin 2019 gjyqi filloi. Mbrojtja e tij tha se nuk kishte prova fizike për të lidhur Merritt me vrasjet dhe nuk kishte asnjë shenjë sulmi në shtëpi. Ata akuzuan policinë pse nuk kishin të dyshuar të tjerë – duke argumentuar se Merritt nuk e ka vrarë mikun e tij më të mirë për para.
Megjithatë Merritt kishte marrë mbi 7,000 dollarë nga llogaria e Joseph pas vrasjeve sepse e dinte që ai nuk do të kthehej. Motivi ishte lakmia dhe vrasjet ishin brutale. “Kishte goditje pas goditjesh në kafkën e një fëmije”, tha prokurori.
Pas një gjyqi katër-mujor, nëntë vjet pas vrasjeve, Merritt u shpall fajtor për katër akuza për vrasje të shkallës së parë. Në janar të këtij viti, ai u dënua me vdekje për krimet e tij.
Merritt, tani 62 vjeç, vazhdoi të këmbëngulë se ishte i pafajshëm dhe akuzoi autoritetet se po e fusnin në kurth.
Nëna e Jozefit, Susan, ishte e trishtuar dhe e quajti atë një “përbindësh, përbindësh të keq” dhe tha se jeta e saj ishte një makth, duke ditur si vdiqën fëmijët. “Ju goditët dy bebe të vogla të çmuara …”, i tha ajo Merritt.
Gjykatësi tha se dënimi i përshtatej krimit.
“Vdekja ishte aktgjykimi i duhur për ato tre vepra,” tha ai. “Dhuna ekstreme dhe egërsia e natyrës së vrasjeve – veçanërisht e dy fëmijëve të vegjël – tejkalojnë shumën e të gjitha provave lehtësuese”, citon Mirror.
Merritt do të qëndrojë në burgun e San Quentin derisa të caktohet një datë ekzekutimi. Sidoqoftë, askush nuk është ekzekutuar që prej vitit 2006 në Kaliforni me kërkesën e Guvernatorit aktual. Ende sot, ka kaq shumë pyetje pa përgjigje në lidhje me vrasjet e McStay. Pa një skenë krimi, saktësisht kur, ku dhe si vdiq familja, mbetet një mister i plotë. Por ajo që dihet është se ata vdiqën në terror.
/S.Ll/Panorama/
NDIQE LIVE "PANORAMA TV" © Panorama.al
