Flet dietologia Viktoria Naco: Dieta ushqimore për të parandaluar osteoporozën

SHPËRNDAJE

Me kalimin e moshës, kockat nisin të dobësohen. Por, përveç viteve, të tjerë faktorë risku që favorizojnë sëmundjen e osteoporozës janë edhe luhatjet e peshës, aktiviteti i ulët fizik si dhe konsumimi i alkoolit dhe duhanit. Ndaj, të gjithë ata që e gjejnë vetën të ekspozuar ndaj këtyre faktorëve, janë të prirur të kenë probleme me osteoporozën, një patologji kjo e lidhur me dobësimin e kockave. Dietologia Viktoria Naco jep këshillat e duhura për të mos lejuar që kjo të ndodhë.

“Në fakt, nuk ka asnjë terapi, e cila mund të ndryshojë dendësinë kockore përgjatë periudhë që është e ulur. Terapia më e mirë është parandalimi nëpërmjet ushqimeve të pasura në kalcium. Zhvillimi dhe formimi i dendësisë kockore ndodh që në moshën e pubertitetit. Zakonisht, përgjatë periudhës së adoleshencës (16 vjeç), reflektohen problematikat e para. Prandaj është shumë e rëndësishme të kontribuojmë nëpërmjet këshillave ushqimore te të rinjtë, por jo vetëm. Konkretisht, mikroelementet ushqimore (vitaminat, por dhe kripërat minerale), parandalojnë dhe ndihmojnë në zhvillimin kockor. Deri tani, kërkimet shkencore vërtetojnë rëndësinë e kalciumit, fosforit, magnezit, vitaminës K , por pa diskutim dhe të vitaminës D, të cilën e marrim kryesisht nëpërmjet diellit)”, pohon dietologia.

37701628_2016863248337726_4280129231964340224_nËshtë më mirë të parandaloni sesa të kuroni! Kjo thënie vlen shumë për problemet me osteoporozën dhe gjithë shëndetin tuaj kockor. Prandaj, mbani mend, mos nënvlerësoni përzgjedhjet tuaja ushqimore pasi janë tepër të rëndësishme për shëndetin tuaj! Osteoporoza është një ndër patologjitë më të shpeshta në botën perëndimore. Nuk ka kërkime shkencore për të parë ndryshimet në popullsi ndër vite, megjithatë organizata shëndetësore ka publikuar një raport të lartë në shfaqjen e saj në shekullin 21.

Por, a ekziston një dietë ushqimore për të kuruar osteoporozën dhe sa i rëndësishëm është kalciumi për ta parandaluar atë, por dhe për të mbrojtur masën kockore? Kalciumi është lënda e parë, nga e cila ndërtohet masa jonë kockore në trup. Në momentin që një person ka një dietë të varfër ushqimore në kalcium dhe nuk plotëson (EARs) nevojat ditore, atëherë trupi i tij do të fillojë të prodhojë hormone, të cilat shpërbëjnë masën kockore për ta përdorur në mekanizma të tjera, që janë po ashtu të domosdoshme në organizëm.

Trupi i një adulti përmban 1,5-2% kalcium nga pesha e tij trupore. Ndërsa 99% të kalciumit në organizmin tonë gjendet te masa kockore dhe te dhëmbët, ndërsa 1% tjetër ndodhet në gjak dhe në indet e buta (te masa muskulare). Atëherë, parandalimi, por dhe ruajtja e shëndetit kockor i dedikohet sasisë së kalciumit dhe vitaminës D (një hormon shumë i rëndësishëm për përthithjen e kalciumit). Burime të pasura në kalcium pa diskutim që janë bulmeti dhe nënproduktet e tij si kosi, djathi, mocarela, parmixhano dhe gjiza, por mund të gjendet dhe në produkte bimore. Nevoja e trupit për kalcium rritet më kalimin e moshës. Kalciumi gjendet edhe në produktet me origjinë bimore dhe shtazore, si baamet, brokoli, spinaqi, sardelet etj.

Pa diskutim, që produktet e bulmetit janë shumë të rëndësishme për trupin e njeriut, edhe pse kalciumin e gjejmë edhe në produkte të tjera, por absorbimi i tij në produktet bimore është më i ulët. Prandaj, në varësi të moshës janë edhe nevojat për kalcium. Kjo do të thotë se me kalimin e moshës, edhe nevojat për kalcium rriten në mënyrë të ndjeshme.

PRODUKTET E TJERA ME KALCIUM

Ekzistojnë edhe produkte të tjera, të cilat përmbajnë kalcium dhe u vinë në ndihmë personave, të cilët nuk mund të konsumojnë qumështin, p.sh mund të kenë intolerancë kundër laktozës, alergji ushqimore, ose nuk iu pëlqen shija e tij. Të tilla janë kosi, dhalla. Po ashtu, edhe frutat e detit përmbajnë një sasi të konsiderueshme në kalcium. Ndërsa për personat që janë veganë ose alergjik ndaj qumështit dhe të gjitha nën produkteve të tij, atëherë mund të përzgjedhin të konsumojnë qumësht soje të fortifikuar në kalcium ose djathin që bëhet nga soja (tofu), si dhe drithëra. Produkte të pasura në kalcium gjithashtu janë soja, thjerrëzat, rrushi i thatë, patate e ëmbël, tërshëra kumbulla të thata, orizi etj.

KËSHILLA

· Të konsumohen ushqime të pasura në vitaminë D (sardele, salmon, e verdha e vezës, bulmeti që merret nga bagëti që kullosin në natyrë të lirë)

· Shmangni konsumin e fosforit, i cili zakonisht pengon absorbimin e kalciumit

· Shmangni konsumin e mishit të kuq, evitoni pijet me gaz, konsumoni sasinë e proteinave ditore në formë të balancuar

· Kontrolloni sasinë e kripës përgjatë ditës suaj, 2 gr deri në 4 gr për personat e shëndetshëm, për rastet me hipertension këshillohet rreth 1 gr.

· Shmangni duhanin dhe alkoolin

TË RREZIKUAR NGA OSTEOPOROZA

· Femrat përgjatë periudhës së menopauzës, sidomos femrat që mund të kenë menopauzë të hershme për shkak të problemeve shëndetësore.

· Femra dhe meshkuj në moshën e tretë (mbi 65 vjeç)

· Personat që kanë humbje të shpeshta dhe të mëdha me peshën trupore.

· Personat me aktivitet fizik të ulët.

· Personat, të cilët janë duke marrë disa medikamente si thiroksi, glukokortikoide etj..

· Veganë

· Duhanpirësit

· Personat që konsumojnë shumë alkool

Te lidhura

 

S'KA KOMENTE

Comments are closed.