Në një postim të tij në “Facebook”, ambasadori Xhafer Ahmeti e ka quajtur ish-kryeministrin e Shqipërisë, Sali Berisha, psikopat. Deklarata e tij është cilësuar si një skandal diplomatik. Ahmeti, i cili ishte thirrur si përfaqësues diplomatik për të përmirësuar marrëdhëniet fqinjësore me Malin e Zi, duke përfaqësuar Kosovën atje si dhe për të promovuar kulturën, traditën dhe historinë e Kosovës e kosovarëve, ka fyer ish-kreun e qeverisë shqiptare, tashmë deputetin e PD-së në opozitë, Sali Berisha. Dhe jo vetëm kaq, Ahmeti ka vijuar me një mori përcaktimesh fyese për vetë shqiptarët e Kosovës, për mënyrën e tyre të mendimit, duke i përcaktuar si njerëz që i mungon aftësia e gjykimit e logjikës. Në postimin e tij në “Facebook”, Ahmeti e ka quajtur psikopat Sali Berishën, si dhe ka shtruar pyetjen se si mundet që një pjesë e popullit të Kosovës ta duan atë.
Postimi i ish-ambasadorit Ahmeti 
Shkarkimi
Ministri në detyrë i Punëve të Jashtme të Kosovës, Enver Hoxhaj, nuk ka pritur shumë për të marrë vendimin e shkarkimit nga detyra të Xhafer Ahmetit, pas statusit që ai kishte shkruar për ish-Kryeministrin shqiptar, Sali Berisha, i cili është konsideruar fyes. Mesazhi i Ahmetit nuk është cilësuar si në linjë me gjuhën e një diplomati. Sipas “Koha.net”, këshilltari i Hoxhajt, Bashmir Xhemaj, duke konfirmuar shkarkimin e ambasadorit ka vlerësuar se: “Komentet e tij në rrjetin social nuk korrespondojnë me rregullat diplomatike dhe sjelljet e një diplomati”. Më tej, Xhemaj ka sqaruar se komentet e Ahmetit nuk paraqesin qëndrimet e institucioneve të Kosovës. “Ministri Hoxhaj personalisht dhe i tërë populli i Kosovës i janë mirënjohës ish-Kryeministrit të Shqipërisë, Sali Berisha, për kontributin e tij të madh për Kosovën”, ka thënë Xhemaj.
