Në Pollenzo, në të parin universitet në botë ku studiohet arti i të gatuarit në të gjitha sfumaturat e tij, celebrohen traditat gastronomike të Shqipërisë me një nga përfaqësuesit më të denjë të kuzhinës shqiptare, shefin Altin Prenga
“Një super sukses! Një hap i rëndësishëm qoftë për shefin e kuzhinës Altin Prenga, qoftë për kuzhinën shqiptare”. Kështu shprehet Stela Hysaj, e vetmja studente shqiptare në Universitetin e Shkencave Gastronomike, UNISG, në Pollenzo të Bra-së (CN), ku – në kuadrin e nismës “Tavole Accademiche” – disa ditë më parë shtroi darkë shefi shqiptar i restorantit “Mrizi i Zanave”. Në “tavolinën akademike” të shtruar nga Altin Prenga, shijuan gatimet e tij 52 persona, njerëz që ushqimin e shohin me syrin e profesionistit: jo vetëm u pëlqen ta shijojnë, por janë ekspertë të tij, e studiojnë në detaje dhe mësojnë ta gatuajnë në mënyrë të përsosur. Ndër këta edhe Roberto Burdese, president i Slow Food Italia, Andrea Riboni, menaxher i nismës
“Unë edhe punoj disa orë në mensën e universitetit e kam qenë e pranishme edhe në darkat e shtruara nga shefat e tjerë të kuzhinës – tregon Stela Hysaj– e mund të them pa hezitim se kjo e Altin Prengës ka qenë ndër më interesantet, më të shijshmet e më të pëlqyerat nga ata që patën fatin ta provonin”. E nuk kishte si të ndodhte ndryshe. Altini solli në UNISG një meny të veçantë me kërce plëndësi të tymosur, djathë të bardhë, pastërma e djathë dhie me bukë misri, fasule me këmbë e kokë derri, tavë Elbasani, mish keci me pilaf, ëmbëlsira me bazë ftoi, shege, thane e kadaifi, si edhe raki rrushi e verë Kallmet.
Në fund të darkës janë pritur me po aq interes sa edhe ushqimi, shpjegimet e Altin Prengës rreth pjatave të saposhijuara e rreth kuzhinës së tij në përgjithësi. Të shumta edhe pyetjet që iu drejtuan nga të pranishmit që donin të mësonin diçka mbi traditat gastronomike shqiptare. Traditë që shefi ynë e prezanton më së miri. Me gatime më shumë se me dhjetëra fjalë.
Altin Prenga është një kuzhinier i ri, plot pasion, i dashuruar me tokën e tij që tani po revolucionon jo vetëm panoramën gastronomike shqiptare, por të të gjithë Ballkanit.
Pas dhjetë vjetëve emigracion në Itali, është kthyer në vendlindje me idenë e qartë për të hapur restorantin e parë “slow food” e për të realizuar ëndrrën e tij të një kuzhine tradicionale që të vlerësojë pjatancat dhe prodhimet vendëse. Gjithçka duke u mbështetur fort në traditën dhe produktet e territorit shqiptar, siç u shpreh shefi shqiptar, me dëshirën që tradita të mos vdesë bashkë me brezat e vjetër.
Përfaqëson shpesh Shqipërinë në evenimente ndërkombëtare të artit të gatimit, si për shembull në sallonin ndërkombëtar të shijes “Salone Internazionale del Gusto” në Torino para dy vjetëve. Edhe kjo darkë e shtruar në UNISG, në kuadrin e “Tavole gastronomiche” është një tjetër vlerësim që i bëhet punës së tij, e cila shkon përtej një tryeze me gatime të mrekullueshme të servirura në mënyrë origjinale e plot fantazi. Me duart e tij të arta, Altin Prenga hap një dritare mbi Shqipërinë, çon kudo aromën e shegëve e mushtit të Lezhës, sherebelit dhe qumështit të lëndinave të zonës, që vjen ende erë trëndelinë.
Keti Biçoku
(Shqiptari i Italisë)
Tortë me luleshtrydhe e mascarpone
Bashkë me lehtësimin e veshjeve, duhet lehtësuar pak edhe ushqimi. Kjo është edhe arsyeja pse ju sugjerojmë një tortë të lehtë për stomakun, por edhe për t’u përgatitur. Përbërësit gjenden fare thjesht dhe nuk do t’ju marrë shumë kohë. Rezultatin do e shihni vetë…
Përbërësit
• 290g miell 00
• 1 bustinë fryrës
• Një qeskë luleshtrydhe ose fruta të tjera
• 5 vezë (ndani të bardhat nga të verdhat)
• 180g mascarpone
• 80g vaj luledielli
• 3 lugë ujë trëndafili
• 200g sheqer pluhur
• 2 lugë sheqer
Përgatitja
• Të bardhat e vezëve të rrahura fort, i përziejmë me dy lugë sheqer
• Pastrojmë frutat dhe i ndajmë në copa
• Në një enë rrahim të verdhat e vezëve me sheqerin pluhur, i bashkojmë mascarponen, vajin, ujin e trëndafilit, miellin e situr dhe sodën.
• E përziejmë me kujdes dhe kur masa të jetë unifikuar, i shtojmë të bardhën me anë të një
spatule nga poshtë-lartë.
• I shtojmë luleshtrydhet e prera.
• Në një formë për ëmbëlsira hedhin përmbajtjen dhe e
zbukurojmë me ndonjë luleshtrydhe të paprerë.
• E fusim në furrën e nxehtë qysh më parë, në një
temperaturë 180 gradë.
• Kjo ëmbëlsirë nuk është shumë e ëmbël, ka një shije
delikate, është e lehtë, për ata që e pëlqejnë ca më shumë sheqerin mund të pudroset me sheqer pluhur.
