Nëse ka një emër që është përdorur më shumë se kushdo tjetër në seancën e sotme në Parlament ai është një ish gardist i 21 Janarit që tashmë po bën karrierë politikë në Partinë Socialiste.
Sali Berisha dhe Jozefina Topalli e përmendën disa herë në fjalimet e tyre në Kuvend si për ti provuar maxhorancës se po luan me viktimat e kësaj tragjedie dhe nuk ka ndërmend të zbardhë ngjarjen.
Po kush është ish gardisti i 21 janarit që u emërua PS-në?
Agron Malaj, komandant seksioni i Njësisë Speciale të Gardës së Republikës në protestën e 21 Janarit ishte një ndër 10 oficerët e shkarkuar nga ministri i Brendshëm, Sajmir Tahiri sapo ai mori detyrën.
10 oficerët ishin pjesëtarë të “grupit të zjarrit”, të cilët qëlluan mbi protestuesit në tubimin ku mbetën katër qytetarë të vrarë.
Por teksa në 26 tetor 2013, Agron Malaj u përjashtua nga Garda, pak kush do ta mendonte se ai do të bënte karrierë politike.
Jo në Partinë Demokratike, siç mund të mendohet, por në Partinë Socialiste.
Disa muaj më vonë ai u emërua kryetar i Partisë Socialiste për Matin dhe në të njëjtën kohë mori edhe detyrën e drejtorit të OSHEE-së për këtë rreth.
Në fushatën e zgjedhjeve lokale të 23 qershorit 2015 ai doli në krah të kryeministrit Edi Rama për të kërkuar votat për kandidaten socialiste.
NDIQE LIVE "PANORAMA TV" © Panorama.al
