Komisioni Parlamentar për Politikën e Jashtme ka miratuar tri kandidatura të reja për ambasadorë në Sllovaki, në Hungari dhe në Emiratet e Bashkuara Arabe.
Ministria e Jashtme ka propozuar ambasadore në Sllovaki Enkeleda Mërkurin, një nga negociatoret e paktit detar me Greqinë në 2009, që u kundërshtua nga Partia Socialiste në atë kohë në opozitë, duke e çuar në Gjykatën Kushtetuese dhe rrëzuar atë. Mërkuri ka qenë specialiste në drejtorinë e Ballkanit në Ministrinë e Jashtme.
“Ne duhet të kishim një rregullore si Komision i Jashtëm për të ditur se çfarë procedurash keni ndjekur për katër kandidaturat e fundit që keni paraqitur për ambasadorë”, tha Islami. Tri kandidaturat e djeshme, Enkeleda Mërkuri, për ambasadore në Sllovaki, Arian Spasse, për ambasador në Hungari dhe Ermal Dredha, për ambasador në Emiratet e Bashkuara Arabe, vijnë nga stafi i Ministrisë së Jashtme me gradën e këshilltarit. Islami në përfundim të mbledhjes, në një debat me anëtarët e këtij komisioni, tha se po propozohen ambasadorë, jo njerëz karriere në diplomaci, por persona me mbështetje politike.
“Ravesa Lleshi, kandidatja për ambasadore në OSBE-së, u propozuar vetëm pse ishte vajza e Ismail Lleshit. Ne duam të çojmë njerëz karriere dhe jo fëmijët e njërit dhe tjetrit. Të gjithë kemi fëmijë, por nuk i propozojmë në këto poste”, u shpreh Islami. Nga ana e tyre, kandidatët për ambasadorë premtuan se do të forcojnë shkëmbimet ekonomike me vendet ku do të shërbejnë, por dhe do të punojnë për njohje të mëtejshme të Kosovës.
NDIQE LIVE "PANORAMA TV" © Panorama.al
