Gjatë vizitës së tij në Kosovë, presidenti i vendit Ilir Meta është takuar ditën e sotme me kryetarin e Partisë Demokratike të Kosovës, Memli Krasniqi.
Përmes një postimi në facebook, ku ka shpërndarë disa pamje nga takimi, presidenti thekson se zhvilloi një bisedë të ngrohtë me eksponentët e lartë të PDK-së, ku ndanë të njëjtin qëndrim për domosdoshmërinë e forcimit të marrëdhënieve strategjike dhe vëllazërore mes Shqipërisë dhe Kosovës, në të gjitha fushat.
Gjithashtu gjatë takimit presidenti shprehu besimin e tij në pafajësinë e ish-presidentit Thaçi dhe ish-kreut të kuvendit Kadri Veseli, si dhe të gjithë bashkëluftëtarëve të tjerë të UÇK-së.
“Kënaqësi e madhe të takoja sot, në prag të Ditës së Flamurit Kombëtar, Kryetarin e Partisë Demokratike të Kosovës, Memli Krasniqi.
Në bisedën e ngrohtë dhe të hapur ndamë të njëjtim qëndrim për domosdoshmërinë e forcimit të marrëdhënieve strategjike dhe vëllazërore mes Shqipërisë dhe Kosovës, në të gjitha fushat.
Vlerësova kontributin e vyer të PDK për konsolidimin e institucioneve të Kosovës, shtetit ligjor dhe demokracisë, si dhe për vijimin e dialogut me Serbinë, përmes një platforme gjithëpërfshirëse.
Lufta e UÇK-së, që iu imponua popullit të Kosovës, rezultoi se ishte e drejtë dhe vendimtare, ndaj ne besojmë në pafajësinë e Presidentit Hashim Thaçi, ish-Kryetarit të Kuvendit, Kadri Veseli, dhe të gjithë bashkëluftëtarëve të tyre”, shkruan Meta në facebook.
NDIQE LIVE "PANORAMA TV" © Panorama.al
