Gjykata e Lezhës ka liruar nga qelia efektivin e Gardës së Republikës, Henri Haxhirajn i cili u arrestua bashkë me tre persona të tjerë në lidhje me laboratorin që kryente falsifikimin e dokumenteve të shumta, përfshirë edhe pasaporta të disa shteteve europiane.
Korespondenti i Panorama bën me dije se këtë të shtunë janë dhënë masat e sigurisë për katër të ndalurit të enjten nga Policia.
Gjykata vendosi që Pertef Musabelli, i cili akuzohet si “koka” e këtij grupi kriminal falsifikatorësh, të lihet në “arrest me burg”.
Ndërsa për efektivin e Gardës, Henri Haxhirajn, Arjan Refugjati dhe Erigesji Moriga u caktua “dëtyrim paraqitje” në policinë gjyqësore.
Gjykata e Lezhës gjithashtu shpalli edhe moskompetencën duke i dërguar aktet në Gjykatën e Tiranës.
Në fund të seancës gjyqësore, avokatet Saimir Vishaj dhe Andi Duraj u shphehen se dëmi është shumë i madh për klientët e tyre, pasi eshte aluduar për ta me të dhëna të paverteta.
HETIMET
I gjithë aktiviteti i tyre ka qenë në monitorim prej të paktën tre muajsh nga Policia, në bashkëpunim me Prokurorinë e Lezhës, të cilët kishin infiltruar edhe agjentin për të zbuluar dhe provuar këtë veprimtari kriminale.
Operacioni policor “Identiteti” u finalizua të enjten nga Policia e Lezhës, në kuadër të të cilit u bë arrestimi në flagrancë i shtetasve Pertef Musabelli, Henri Haxhiraj, Arjan Refugjati dhe Erigesji Moriga; ndërsa janë shpallur në kërkim dhe po punohet për kapjen e dy bashkëpunëtoreve të tjerë, shtetasit Artur Terziu dhe Ilir Mata.
Hetimet në lidhje me rastin po drejtohen nga prokurori Françesk Ganaj, i cili ditën e premte ka dërguar kërkesat në gjykatën e Lezhës për caktimin e masës së sigurisë “Arrest në burg” ndaj 4 personave të arrestuar, ndërsa seanca gjyqësore pritet të mbahet ditën e shtunë.
SI DREJTOHEJ GRUPI
Koka e këtij grupi kriminal falsifikatorësh rezulton të jetë Pertef Musabelli.
Emri i tij nuk rezulton i skeduar më herët në listën e Policisë, por ajo që dihet është fakti se ai është babai i Alfred Musabellit, i riu që mbeti i vrarë në Qytetin Studenti nga Kostandin Xhuvani.
Në dosjen hetimore thuhet se Musabelli kishte të gjithë logjistikën e laboratorit për krijimin e dokumenteve false dhe mbante kontaktet me persona të tjerë, që siguronin pagesat dhe klientelën.
Musabelli, së bashku me punonjësin e Gardës së Republikës, shërbenin si koordinatorë dhe, kundrejt shumave monetare, arrinin të nxirrnin dokumente false me qëllim për të udhëtuar në drejtim të disa shteteve të Europës dhe deri në Shtetet e Bashkuara të Amerikës.
Deri në këtë fazë të hetimit është provuar plotësisht implikimi dhe roli drejtues i Pertef Musabellit dhe gardistit Henri Haxhiraj.
Kjo pasi gjatë ushtrimit të aktivitetit të paligjshëm, një agjent Policie ka arritur të infiltrohet në këtë grup, duke nxjerrë në 5 raste pasaporta të falsifikuara dhe dokumente të tjera false.
NDIQE LIVE "PANORAMA TV" © Panorama.al
