Një 26-vjeçar, i cili prej pak ditësh ishte kthyer nga Italia, u plagos rëndë me 2 plumba nga një person ende i paidentifikuar që lëvizte me motor. Ngjarja ndodhi dje rreth orës 14:30, në zonën e “Xhamllikut”, në Tiranë, kur i riu sapo kishte hipur në makinë dhe po bëhej gati të lëvizte nga vendi ku kishte parkuar. Burime nga Policia thanë se i dëmtuari është shtetasi Xhevahir Shabani, nga Miloti, emigrant prej vitesh në Itali, i cili kishte vetëm pak kohë që ishte kthyer në Shqipëri për pushime.
Ndërsa autori i dyshuar i ngjarjes është një i ri që lëvizte me një motor tip “Kavasaki”, pa skafandër në kokë, ende i paidentifikuar nga Policia. I plagosuri kishte ndaluar për pak çaste makinën tip “Golf 6”, me targë DW 250 TH, për të blerë diç- ka në një dyqan aty pranë dhe ishte kthyer për të lëvizur nga vendi ku kishte parkuar.
Të njëjtat burime thanë se ngjarja dyshohet të ketë ndodhur pas një konflikti të momentit që 26-vjeçari ka pasur me autorin, i cili fillimisht i është afruar duke e sharë te xhami i makinës, më pas ka nxjerrë nga brezi pistoletën dhe e ka qëlluar dy herë. Pas ngjarjes, i dyshuari i ka dhënë gaz motorit dhe është larguar nëpërmjet një rrugice që të nxjerr në afërsi të një shkolle 9-vjeçare, e më pas pranë lumit të Lanës, te materniteti “Koço Gliozheni”.
Megjithatë, burimet thanë se nuk përjashtohet mundësia që i plagosuri dhe autori të kenë pasur njohje të mëparshme me njëri-tjetrin, dyshim që mbetet për t’u vërtetuar vetëm nga dëshmia e 26- vjeçarit, që për momentin e ka të pamundur të flasë. Ai i është nënshtruar një ndërhyrjeje të gjatë kirurgjikale në Spitalin e Traumës dhe sipas mjekëve gjendja e tij shëndetësore është mjaft e rëndë. Ndërsa pranë vendit të ngjarjes, shërbimet e Komisariatit nr. 4 dhe oficerët e Seksionit të Krimeve Kundër Jetës kanë shoqëruar 15 dëshmitarë që kanë parë nga shumë afër momentin e sherrit mes të rinjve dhe plagosjen.
DESHMITARET
Vendi ku ndodhi plagosja e 26-vjeçarit Xhevahir Shabani është në një zonë mjaft të populluar, i rrethuar nga dyqane dhe lokale, duke bërë që ngjarja të shihej nga dhjetëra dëshmitarë. Personi më i afërt që ndodhej pranë makinës ku u qëllua Shabani ishte një tregtar ambulant peshku, i cili ishte i pari që u shoqërua në Polici për të dhënë dëshminë e tij. Ndërsa edhe disa shitës dyqanesh e klientë të lokaleve aty pranë kanë dhënë dëshminë e tyre rreth asaj që ka ndodhur.
Një prej dëshmitarëve që ndodhej në lokalin përballë vendngjarjes tregoi dje se i plagosuri ishte në një dyqan dhe sapo hipi në makinën që kishte parkuar në anë të rrugës, një djalë i ri me motor iu afrua afër. “Djali me motor, i ri në moshë, iu afrua te makina e parkuar dhe shoferi hapi xhamin. Fillimisht debatuan dhe u shanë me njëri-tjetrin. Ndërsa brenda pak sekondash pashë atë djalin me motor që nxori pistoletën dhe e qëlloi nga xhami i makinës.
Dëgjova dy krisma, por pistoleta mund të ketë qenë e vogël, pasi të shtënat nuk ishin të forta”, tregon dëshmitari. Ai thotë se autori nuk kishte skafandër, as kapele dhe, sipas tij, fytyra e tij dukej shumë qartë. Dëshmitari shprehet se, pasi qëlloi shoferin e makinës, i riu me motor lëvizi me shpejtësi në rrugicën përbri rrugës kryesore, aty ku kishte parkuar i plagosuri dhe u zhduk brenda pak sekondash.
ETLEVA DELIA
