Disa ditë më parë Antonio Kasano, i cili ka firmosur një kontratë me skuadrën e Serisë A, Veronën, njoftoi se do të tërhiqej nga futbolli. Po atë ditë, disa orë më vonë, ai doli në konferencë për shtyp duke thënë se kishte ndryshuar mendje pasi tërheqjen e kishte njoftuar në një moment dobësie.
Megjithatë futbollisti barez, i njohur për çmenduritë e tij, ka fituar gjithë vëmendjen e opinionit sportiv pasi ka njoftuar sot sërish tërheqjen nga futbolli dhe ka kërkuar prishjen e kontratës me Veronën. Sipas “Sky Sport”, ai nuk do të paraqitet të mërkurën në stërvitjen e skuadrës.
Presidenti i Veronës, Mauricio Seti, e ka komentuar këtë vendim të sulmuesit 35-vjeçar duke thënë: “Ky djalosh nuk ia del nga koka, ndonëse nga pikëpamja fizike dhe atletike është shumë mirë. Profesionalisht nuk mund ta kritikosh për asgjë, me sa duket nuk arrin të qëndrojë i qetë dhe i kthjellët në një grup dhe do të qëndrojë në shtëpi. Ka një ulje-ngritje, flet e pastaj rri i heshtur. Mëkat, pasi nga pikëpamja profesionale po bënte gjithçka mirë.”
NDIQE LIVE "PANORAMA TV" © Panorama.al
