Drejtori i UKT, Tiranë: Kush nuk paguan, do të ketë ndërprerje të ujit.
Qytetarët që nuk kanë paguar faturat e ujit, mund ta bëjnë pagesën deri në datën 14 prill, pa përfshirë kamatëvonesat, ndërsa pas kësaj date Ujësjellësi do të llogaritë edhe pagesën e kësaj kostoje.
Drejtori i Ujësjellës-Kanalizimeve në Tiranë, Sahit Dollapi, gjatë një inspektimi në kryeqytet ditën e djeshme, bëri të ditura edhe detajet si përsa i përket vendimit të UKT për të lehtësuar qytetarët, ashtu dhe për borxhin që institucionet i kanë. Në deklaratën e tij, kreu i Ujësjellës-Kanalizimeve u shpreh se institucionet shtetërore kanë një sërë detyrimesh të palikuiuduara prej kohësh, të cilat arrijnë në vlerë 1.8 milionë dollarë. Të ndara në institucione lokale apo qendrore, duket se rekordin e borxhit e mbajnë të dytat. Sipas shifrave të UKT, janë 13 komuna dhe bashki në territorin e rrethit të Tiranës që kanë një borxh të bartur, i cili arrin në 500 mijë dollarë, ndërkohë që pjesën tjetër të borxhit prej 1.3 milionë dollarësh e kanë institucione të tjera buxhetore dhe jobuxhetore. Dollapi u bëri thirrje dje si qytetarëve, subjekteve private apo institucioneve shtetërore që të paguajnë borxhet që kanë ndaj Ujësjellësit, në të kundërt do të merren masa deri në ndërprerjen e furnizimit me ujë. Kjo nuk është hera e parë që Ujësjellës-Kanalizime del dhe bën thirrje për shlyerje të borxhit, ndërkohë që peshën më të madhe të tij e kanë mbajtur institucione si Ministria e Shëndetësisë në qendrat e saj rajonale, apo Ministria e Arsimit nga mospagesa e faturave të energjisë në disa shkolla në të gjithë vendin. Lidhur me qytetarët, drejtori i UKT, Sahit Dollapi, u shpreh se data 14 prill do të jetë data e fundit e tolerimit për të paguar faturat pa asnjë detyrim shtesë që vjen si efekt i vonesës në pagesa.
Naço: Ja si do trajtohen punonjësit e HEC-eve
Privatizimi i hidrocentraleve Bistrica 1 dhe Bistrica 2 së bashku me Hidrocentralin e Lanabregasit, janë bërë pjesë e kërkesave të Federatës Sindikale e Industrisë së Shqipërisë. Kjo e fundit, në një peticion dërguar ministrit të Ekonomisë, Nasip Naço, ka kërkuar të dijë lidhur me përfitim që do të kenë punonjësit apo pronarët. Në përgjigjen e Naços thuhet se privatizimi 100 për qind nuk ka parashikuar aksione për punëtorët dhe pronarët, ndërkohë që këta të fundit do të trajtohen sipas ligjeve në fuqi.
NERTILA MAHO
NDIQE LIVE "PANORAMA TV" © Panorama.al
