Edhe pse FIFA dhe UEFA po luftojnë trukimet me çdo mjet, përsëri e kanë të pamundur të survejojnë më saktësi edhe miqësoret. Ndërkohë, bëhet e ditur nga gazeta gjermane “Sportbild” se rusët e Rubin Kazanit kanë trukuar ndeshje miqësore gjatë fazës përgatitore në Turqi. Shefi i komisionit hetimor të Gjykatës së Bohumit, Fridhelm Althans, konfirmon se ka pasur dyshime mbi humbjen e Rubinit në ndeshjen miqësore ndaj Dinamo Drezden (3-0) dhe testit ndaj Paderbornit të Alban Mehas (2-1). Më 19 janar 2014, Drezen fiton 3-0 ndaj Rubin Kazanit, por hetuesit bëjnë të ditur se ekipi rus ka aktivizuar për këtë ndeshje 8 lojtarë të një ekipi tjetër, Neftekhimik Nishnekamsk, të cilët renditen në vend të parafundit në Ligën 2 ruse. Althans merr informacione nga Sllovenia se për këtë ndeshje ishin vënë baste të mëdha për humbjen e Rubinit. Më 25 janar 2014, Paderborni e mbylli pjesën e parë në disavantazh 0-1. Mesfushori shqiptar Alban Meha luajti vetëm 60 minutat e para. Në pjesën e dytë trajneri i Rubinit aktivizon lojtarët e stolit. Teksa Paderborni barazon në minutën e 67-të, “Sportbild” njofton se u vunë baste të fuqishme pas minutës së 85-të për një gol të Paderbornit. Në minutën e 89-të, gjyqtari akordon penallti dhe Paderborni fiton 2-1, njëkohësisht mafia fitoi bastin në fjalë. Përflitet gjithashtu se ka pasur dyshime edhe për ndeshjen miqësore në Turqi mes Arminia Bilefeld dhe Inter Baku, e cila përfundoi në barazim 2-2. Rasti i fundit është survejuar edhe nga kompania “Sportradar”.
Paderborn 2
Rubin 1
Golat: Ten Vorde 67’, Vuçinoviç 89 (p)/Torbinski 35’
SC Paderborn 07: Kruze, Vemer (Hainloth 60’), Hynemaier (Velker 60’), Zigler (Shtrohdik 60’), Hartherz (Bertels 60’), Vrançiç (Shonlau 60’), Bakalorz (Krëshe 60’), Alban Meha (Kok 60’), Vurc (Vuçinoviç 60’), Saglik (Ten Vorde 60), Kahunga.
