Tajlanda po kërcënohet nga një krizë e thellë humanitare pas përmbytjeve më të këqija në 50 vitet e fundit, të cilat lanë pjesë të kryeqytetit të përmbytura me mbi 2 metra ujë, shkaktuan mbi 380 viktima dhe lanë pa shtëpi 113 mijë njerëz. Përmbytjet më të këqija që ishin parashikuar për dje u evituan, por shumë zona janë nën ujë, pasi të shtunën, muri i qytetit, i cili mund të pengonte ujin në deri 2.5 metra lartësi, ishte i pamjaftueshëm për të penguar hyrjen e ujit, pasi niveli i tij ishte më i lartë. Vetëm qendra e Bangkokut i ka shpëtuar përmbytjes, por ka shumë zona në kryeqytet ku uji u arrin banorëve deri në kraharor. Qeveria tajlandeze ka ndërtuar më shumë se 1700 qendra strehimi nëpër të gjithë vendin, ku po strehohen të pastrehët që nga nisja e përmbytjeve në këtë vend, në korrik, për shkak të shirave të dendur. Tani ekziston rreziku i sëmundjeve nga ujërat e ndotur dhe insektet. Dëmi i përgjithshëm i përmbytjeve, deri tani, është llogaritur nga qeveria tajlandeze në 6 miliardë dollarë. Kryeministrja Jingluk Shinauatra u ka kërkuar bizneseve të mos depozitojnë ushqimet, pasi paniku se kjo lloj krize do të zgjasë ka bërë që të “zhduken” nga ato dyqane që kanë mbetur hapur edhe ushqimet esenciale.
NDIQE LIVE "PANORAMA TV" © Panorama.al
