Sipas Prokurorisë së Tiranës, ngjarja lidhet me një borxh të papaguar nga shtetasi A.M. për personin nën hetim Edison Kajtazi, gjatë kohës që ata kanë qenë në Itali. Dje Gjykata e Tiranës vendosi masën e sigurisë “arrest me burg” për pesë të arrestuarit e akuzuar për vrasjen në bashkëpunim të biznesmenit Zenka. Të dyshuarit Agron Goxhaj, Artan Hasani, Enton Ibrahimi, Alket Halitaj, si dhe i akuzuari për “përkrahje të autorit të krimit”, Andi Veshi, u paraqitën njëri pas tjetrit para gjyqtarit të gatshëm, Julian Haxhiu. Burime brenda seancave me dyer të mbyllua sqaruan se të dyshuarit kanë mohuar të jenë përfshirë në vrasjen e biznesmenit. Ata kanë pretenduar se ndodheshin rastësisht në vendin e ngjarjes dhe se nuk kishin konflikt me askënd. Sipas burimeve, ata ia kanë lënë të arrestuarit tjetër, Edison Kajtazi, “barrën” e autorësisë së vrasjes. Masa e sigurisë ndaj Edison Kajtazit pritet të zhvillohet sot në Gjykatën e Tiranës.
NGJARJA SIPAS PROKURORISË
Sipas dosjes së Prokurorisë, mbrëmjen e së premtes, personat nën hetim Edison Kajtazi, Agron Goxhaj, Enton Ibrahimi, Artan Hasani dhe Alket Halitaj kanë pritur në vendin e quajtur “Tuneli” shtetasit Besnik Mancaku, viktimën Ariel Zanga etj., për t’u “sqaruar” lidhur me pjesën e borxhit që nuk i kishte kthyer shtetasi A.M. Fillimisht personi nën hetim, Besnik Mancaku, ka shkuar i vetëm dhe është takuar për të biseduar me Edison Kajtazin dhe personat e tjerë që e shoqëronin dhe pas tij ka shkuar edhe viktima me shtetasin Besnik Mancaku. Po sipas hetimeve, viktima Aurel, pasi ka shkuar te “Tuneli”, është ndjerë i fyer nga veprimet dhe fjalët e personit nën hetim Edison Kajtazi, që po bënte presion dhe që kishte ardhur i armatosur dhe ka tentuar t’i afrohej. Mancaku i është drejtuar viktimës Aurel Zenka që kishte armë në dorë dhe është kapur me të trup më trup. Referuar dosjes, në këtë moment është dëgjuar një zë nga personat e tjerë që ishin me Edison Kajtazin, që thoshte: “Gjuaji, gjuaji” dhe pas këtij momenti janë dëgjuar disa të shtëna arme zjarri. Kajtazi ka qëlluar drejt viktimës, ndërsa personat e tjerë që kanë gjuajtur me armë, nuk është përcaktuar se cilët kanë gjuajtur, apo në çfarë drejtimi kanë gjuajtur. Pasi kanë përfunduar të shtënat, grupi i personave që ishin bashkë me E.Kajtazi janë larguar me vrap mbas tunelit, në drejtim të Njësisë Bashkiake nga Tregu Elektrik, ndërsa viktima ka dalë nga tuneli, është afruar drejt shtetasit B. dhe ka rënë mbi trupin e tij. Fillimisht personi nën hetim B. Mancaku, ka shkuar drejt grupit të personave që u larguan me vrap, e mandej është kthyer te vendi ku ishte shtetasi B. me viktimën, i cili fillimisht reagonte, por pa folur ndonjë fjalë. Shtetasi B. së bashku me një shok të lagjes së tij kanë pritur ardhjen e ambulancës, por meqë ajo po vonohej, ata e kanë çuar viktimën në Spitalin Ushtarak me automjetin e personit nën hetim Mancaku.
Të arrestuarit
n Edison Kajtazi
I dyshuar për vrasjen
n Agron Goxhaj
I dënuar më parë për plagosje, i dyshuar për vrasjen
n Artan Hasani
42 vjeç, i dënuar më parë për krime ndaj jetës dhe prodhim e shitje municionesh luftarake, i dyshuar
për bashkëpunim
n Enton Sada (Ibrahimi)
I dënuar më parë për vrasje me paramendim, i dyshuar për bashkëpunim
n Alket Halitaj
I dyshuar për bashkëpunim
n Andi Veshi
I dyshuar për ndihmë ndaj autorëve
n Besnik Mancaku
I dyshuar për dëshmi të rreme
I dyshuari kryesor për ekzekutimin pranoi autorësinë e krimit në Durrës
Prokuroria kërkon “arrest me burg” për Edison Kajtazin
ARMAND BAJRAMI
