Një tetëvjeçare jemenase, e cila vazhdonte shkollën fillore, nuk e kishte fare idenë se po martohej me një kushëririn e saj të parë. Martesën e kishte porositur i ati, por daja i vajzës, me emrin Ifthikar, kishte lajmëruar gazetat dhe aktivistët e të drejtave të njeriut, duke e prishur në kohë ceremoninë. Policia ka arrestuar babanë e nuses tetëvjeçare në provincën veriore Ibb. Aktivistët dhe gazetarët lokalë kontaktuan me policinë, që kishte mbërritur në kohë. I ati i nuses u burgos, por u lirua pas gjashtë ditësh, pasi premtoi se do të priste për martesën e së bijës deri kur ajo të mbushte moshën e miratuar me ligj. Policia kishte arritur në kohën e duhur për të bllokuar martesën dhe kishte gjetur nënën e vajzës dhe të bijën të kyçura në një shtëpi. Nëna fillimisht e kishte kundërshtuar dasmën, por ishte dorëzuar kur babai i vajzës kishte kërcënuar se do të divorcohej prej saj, ka shkruar për “Gulfnews” gazetari Yaser Abad. “Daja i vajzës ishte inatosur kur kishte mësuar për dasmën, por nuk kishte mundur ta ndalonte vetë atë. Kështu kishte kontaktuar gazetarë dhe aktivistët. Babai i saj tha se kishte bërë një ‘zotim trial’ për të martuar vajzën e tij me nipin, pasi një tjetër mashkull e kishte refuzuar kërkesën e tij për të ofruar të bijën për martesë”, shkruhej në mediat lokale. Praktika e martesës së vajzave të vogla në Jemen është shumë e përhapur dhe grupet ndërkombëtare të të drejtave të njeriut po përpiqen për të bërë presion ndaj qeverisë për t’i ndaluar me ligje më të ashpra këto martesa.
