Një 25-vjeçar, i cili hiqej si agjent i Interpolit, është ndaluar nga Policia e Tiranës pasi akuzohet se u bënte presion drejtuesve të makinave në mënyrë që t’u merrte para. I dyshuari, sipas Policisë, është Luftar Hoxha, nga Mati, banues në kryeqytet, të cilit iu gjet edhe një dokument i falsifikuar me siglën “Interpol”, të cilën e përdorte për të bindur shoferët që ishte punonjës policie. Dyshohet se ai ndalonte automjetet me targa të huaja, duke pretenduar se i kishte nën hetim si të trafikuara nga jashtë dhe në rast se nuk donin t’ua bllokonte, atëherë duhej t’i jepnin një ryshfet, që varionte nga 5 mijë deri në 10 mijë lekë të rinj. Identifikimi i tij u bë në bazë të një kallëzimi që ishte bërë disa ditë më parë në Policinë e Tiranës nga një qytetar, i cili deklaroi se kishte rënë pre e mashtrimit të oficerit të rremë të Interpolit. Burime nga Policia thanë se i dëmtuari është shtetasi Rikel B., 23 vjeç, banues në zonën e Saukut të Vjetër. Ai ka bërë kallëzim se disa ditë më parë, pas mesnatës, ka qenë duke udhëtuar me mjetin e tij me targa të huaja në afërsi të 15-katëshit në qendër të Tiranës dhe personi në fjalë i ka bërë shenjë që të ndalonte. Sipas tij, një automjet tip “BMW”, me targë angleze RY 51 LVJ, i është afruar shumë pranë dhe drejtuesi i mjetit, që rezultoi të ishte “oficeri” i Policisë Luftar Hoxha, i ka kërkuar të ndalonte. Por, duke e parë si të dyshimtë këtë veprim dhe për shkak se nuk e njihte personin e makinës tjetër, 23-vjeçari ka vazhduar rrugën në drejtim të Saukut, për të shkuar në shtëpi. Pas një ore është këmbyer sërish me makinën e Hoxhës dhe kësaj herë ka ndaluar. I dyshuari i ka treguar një dokument me mbishkrimin “Interpol” dhe i ka thënë se ishte oficer i kësaj zyre, duke pretenduar se makina e të riut rezultonte e trafikuar nga jashtë dhe për këtë arsye duhej ta bllokonte. Hoxha i ka kërkuar dokumentet e makinës, por i ka propozuar edhe një marrëveshje, në mënyrë që të vazhdonte rrugën për në shtëpi. Ai i ka kërkuar 10 mijë lekë të rinj në mënyrë që ta linte të shkonte dhe të mos i bllokonte makinën.
Policia e Tiranës, pas këtij kallëzimi, ka arritur ta identifikojë dhe më pas ka ndaluar të dyshuarin e ngjarjes, Luftar Hoxha, të cilit në makinën që drejtonte i është gjetur edhe një dokument me siglën “Interpol”, me emrin e tij. Më pas ka treguar se dokumenti ishte i falsifikuar dhe e kishte blerë në Greqi. Burimet thanë se i ndaluari dyshohet ta ketë përdorur këtë dokument edhe në raste të tjera, si në rastin që është denoncuar, dhe për këtë arsye kanë nisur verifikimet.
ETLEVA DELIA
NDIQE LIVE "PANORAMA TV" © Panorama.al
