“Lajm i mirë që PD do kthehet në Kuvend”- Yuri Kim flet pas takimit me Bashën: PS të ngrihet mbi interesat partiake!

Jul 30, 2021 | 14:29
SHPËRNDAJE

Ambasadorja amerikane në Shqipëri Yuri Kim ka dhënë një prononcim për mediat pas takimit që zhvilloi me kreun e PD-së Lulzim Basha në selinë blu.

Ambasadorja amerikane tha se është një lajm i mirë që PD do të rikthehet në Parlament në shtator, ndërsa shtoi se është me rëndësi që PS të ngrihet mbi interesat partiake.

Pata një diskutim shumë të mirë me kryetarin e PD Lulzim Basha sot, ishte në vijim të takimit që kemi pasur kur Ndihmës Sekretari i Shtetit Reeker ishte në Tiranë. Folëm për forcën e marrëdhënieve Shqipëri-SHBA. Gjithashtu folëm për rolin e rëndësishëm që PD ka luajtur në vendosjen e marrëdhënieve SHBA-Shqipëri dhe për rëndësinë që Shqipëria të qëndrojë në rrugën e saj për në BE. 

Është lajm i mirë që PD do të kthehet në Kuvend në muajin shtator. Kuptojmë që PD dhe të tjerë kanë shqetësime për zgjedhjet e 25 prillit, por këto shqetësime janë pasqyruar në raportin e ODIHR-it. Do të jetë e rëndësishme dhe e domosdoshme që kjo gjë që të bëhet në mënyrë domethënëse dhe SHBA-të të mbështesin këto përpjekje.

Ndërsa PD do të rikthehet në Kuvend, është e rëndësishme që PS të mund të ngrihet mbi interesat e saj partiake. Gjithashtu dëshiroj të theksoj rëndësinë që ndërsa kryetarët e partive do futen në Kuvend, të shoqërohen nga deputetë që e meritojnë përfaqësimin e Shqipërisë”, tha Yuri Kim.

Deklarata e plotë e Ambasadores Yuri Kim

Pata një diskutim shumë të mirë dhe të plotë me Kryetarin e PD Lulzim Basha sot. Ishte në vijim të takimit që ai pati kur Zv. Ndihmës Sekretari i Shtetit Phil Reeker ishte në Tiranë.

Folëm për forcën e marrëdhënieve Shqipëri-SHBA, rolin shumë të rëndësishëm që Partia Demokratike ka luajtur në vendosjen e marrëdhënieve SHBA-Shqipëri si dhe rëndësinë që ka që Shqipëria të qëndrojë në rrugën e saj drejt Europës.

Nuk ka dyshim për rolin historik që Partia Demokratike ka luajtur, është i pazëvendësueshëm dhe i domosdoshëm dhe, në këtë kuptim është lajm shumë i mirë që PD do të rikthehet në parlament në shtator. Kuptoj që PD dhe të tjerë kanë shqetësime në lidhje me zgjedhjet e 25 prillit dhe të gjithë e dimë që ato shqetësime janë pasqyruar në raportin përfundimtar të nxjerrë nga ODIHR.

Do të jetë jashtëzakonisht e rëndësishme dhe e nevojshme që institucionet përkatëse t’i trajtojnë ato shqetësime në mënyrë kuptimplotë dhe Shtetet e Bashkuara do të vazhdojnë të mbështesin këto përpjekje për të përmirësuar në mënyrë konstante zgjedhjet dhe demokracinë në Shqipëri.

Teksa PD kthehet në parlament, do të jetë shumë e rëndësishme që partia në pushtet, PS, të tregojë se është serioze për t’u ngritur mbi interesat partiake për hir të vendit.

Do të doja të theksoja gjithashtu përgjegjësinë që kanë kryertarët e partive për t’u siguruar që kur të hyjnë në atë parliament, të shoqërohen nga anëtarë që janë të denjë për të përfaqësuar Shqipërinë. Do të jetë veçanërisht e rëndësishme që edhe PD t’i mendojë këto çështje.

Siç e përmenda më parë, Partia Demokratike ka luajtur një rol të pazëvendësueshëm, për ta nxjerrë këtë vend nga komunizmi, për ta çliruar nga diktatura.

Do të ishte një ironi historike por edhe një tragjedi për vendin, jo vetëm për partinë, nëse partia do të hante bar për hir të interesave personale të një njeriu. Shpresa jonë është që partitë do të ecin përpara, që ky vend do të ecë përpara, që bashkëpunimi midis Shteteve të Bashkuara dhe Shqipërisë të ecë përpara.

E ardhmja po pret.

Ka vendime të vështira përpara për të gjithë. Shpresoj që të gjithë të mund të pushojnë mirë gjatë gushtit, por shpresoj edhe që kur të kthehen të freskët dhe të ripërtërirë në vendosmërinë e tyre për të zgjedhur të ardhmen kundrejt të kaluarës.

© Panorama.al

Te lidhura