PARALAJMËRIMI
Mbi 50 bare, lokale dhe bar-restorante luksoze në Durrës do t’u nënshtrohen shembjeve dhe matrapikut të fadromave të Inspektoratit Ndërtimor Urbanistik Kombëtar, i cili këtë radhë ka për qëllim t’i bëjë një pastrim gjeneral qytetit bregdetar nga ndërtimet e paligjshme. Konfirmohet zyrtarisht se javën e ardhshme, pasi të jetë përmbyllur misioni në zonën e plazhit, mjetet e rënda të INUK-ut do të zbarkojnë në zemër të qytetit, ku do të shembin lokalet dhe barrestorantet e ndërtuara te mauzoleu “Dëshmorët e Kombit”, njohur ndryshe si lulishtja. Sipas INUK, të njëjtin fat do të kenë edhe lokalet luksoze në hyrje të qytetit të Durrësit, me qëllim shtimin e hapësirave të gjelbra. Pronarët e këtyre subjekteve shprehen të irrituar ndaj urdhrit për shembjen e objekteve, duke thënë se qeveria dhe pushteti vendor nuk duhet t’i kishte lejuar të investonin nëse kishin në plan shembjen. Në listën e gjatë të shembjeve përgjatë këtij aksioni disaditor janë edhe lokalet e barrestorantet e ngritura përgjatë bregdetit nga Bërryli deri në Currila. Sipas burimeve nga INUK, në këtë zonë do të ndërhyhet fill pasi të ketë përfunduar shembja e të gjitha ndërtimeve të paligjshme në qytet dhe në zonën e plazhit.
INUK EDHE NË ELBASAN
Inspektorati Ndërtimor Kombëtar ka nisur prishjen e ndërtimeve pa leje edhe në qarkun e Elbasanit. Janë rreth 220 objekte në qytetin e Elbasanit dhe më shumë se 500 në të gjithë qarkun, të cilat së shpejti do të prishen nga fadromat e INUK. Të shoqëruar edhe nga Policia e Shtetit, INUK ka nisur aksionin te rruga e doganës, për të vijuar gjatë gjithë javës me objektet pa leje që kanë zënë hapësirat publike. Të lajmëruar për prishjen e objekteve një pjesë e pronarëve kanë ndërhyrë në kohë për të hequr sendet e ndryshme nga ndërtimet e tyre, për t’u tërhequr më pas përpara forcës së ligjit. Dita e djeshme ka pasur edhe reagime nga ana e pronarëve të objekteve, të cilët kanë pretenduar se e kanë objektin në proces legalizimi.
