Gjosha: Barazia gjinore, kusht për integrimin

“Barazia ndërmjet grave dhe burrave është një nga parimet themelore të Bashkimit Europian. Barazia gjinore është një nga pesë vlerat mbi të cilat është themeluar BE-ja, është më shumë se një slogan, arritja e saj është përgjegjësia jonë”. Kështu u shpreh dje gjatë konferencës “Gratë dhe procesi i Integrimit Europian” ministrja Klajda Gjosha. Iniciatorja e këtij takimi me të gjithë aktorët theksoi se qeveria është e vendosur të forcojë rolin e gruas në shoqëri dhe i ka shpallur luftë trafikut të qenieve njerëzore dhe dhunës në familje. Ajo e vuri theksin në nevojën e përfshirjes së grave në procesin e vendimmarrjes. Ministrja theksoi se qeveria do të punojë me angazhim të plotë për përfshirjen në skemën e sigurimeve shoqërore, të punës së papaguar të grave dhe vajzave shtëpiake. Po kështu, do të merren masa për rritjen e aksesit në arsimin profesional, duke eliminuar stereotipat gjinorë, si dhe zbatimin, forcimin dhe monitorimin e ligjit për mbrojtjen e grave dhe fëmijëve ndaj dhunës. “Ne jemi të angazhuar të punojmë për pagë të barabartë për të njëjtin vend pune, çështje kjo e fokusuar më shumë në sektorin privat”, tha Gjosha. Duke vënë në dukje se shoqëria shpeshherë i ka diskriminuar gratë, ambasadori i BE në Shqipëri, Sequi,  theksoi se barazia gjinore është fondamentale. Një tjetër e ftuar në panel, kryetarja e Komisionit Parlamentar të Integrimit Europian, Majlinda Bregu, u shpreh se është bërë një punë e madhe për legjislacionin, i cili është sot mekanizëm reference për të dënuar dhunuesit. “Por vetëm ndërgjegjësimi, vetëm ligji nuk mjaftojnë. Duhet një fushatë agresive kundër dhunës në familje, e cila nuk bëhet vetëm nga qeveria, por nga të gjithë aktorët. Sot kemi një situatë agravante të dhunës në familje, ndërkohë që kemi një legjislacion të mirë, ndaj është e domosdoshme një fushatë agresive”, tha Bregu.

NDIQE LIVE "PANORAMA TV" © Panorama.al