Në kushte normale të ekonomisë, ulja e normës bazë të interesit ka një seri efektesh zinxhirë. Kështu, së pari bankat janë më të interesuara të kreditojnë ekonominë duke ulur interesat, ndërsa individët janë më pak të interesuar të kursejnë para në kushtet kur interesat janë të ulëta. Nga ana tjetër, individët janë më të prirur të bëjnë investime dhe të shpenzojnë më shumë, pasi ulja e normës bazë të interesit për lekun e zhvlerëson këtë të fundit. Ky është reagimi në situatën normale, kurse në një situatë të komplikuar si ajo që ka trashëguar ekonomia e post-krizës në vendin tonë, reflektimi i uljes është bërë vetëm tek interesat e depozitave dhe shumë pak tek interesi i kredive. Qytetarët kanë vijuar të priren drejt kursimit duke e ulur dukshëm konsumin, nën mesataren historike. Një tjetër efekt që ka ulja e normës së interesit është edhe ulja e interesit të bonove, çka i leverdis në rastin më të mirë qeverisë, e cila i përdor këto të fundit si instrument borxhi.
