Edi Rama e Kumbaro prezantojnë drejtorët e rinj

Përpara një komuniteti artistësh, Kryeministri Edi Rama dhe ministrja e Kulturës, Mirela Kumbaro, prezantuan dje në ambientet e Kryeministrisë drejtorët e rinj, të Galerisë Kombëtare të Arteve dhe të Teatrit të Operës dhe Baletit. Duke prezantuar artistët Ilir Kerni dhe Artan Shabani, pa harruar të përmendë edhe kontributin e drejtorëve të mëparshëm, Kumbaro premtoi se kjo është pjesa e parë e një reforme shumë më të thellë që do të përfshijë artin dhe kulturën. “Jo thjesht duke ndërruar drejtuesit, secili lë gjurmën e vet dhe ndërton pjesën e vet të historisë, por reforma në sistem, koncept, kulturë për artistët, krijuesit e sidomos për të rinjtë. Kultura dhe institucioneve të artit t’i hapen të rinjve, edhe si një element shumë i rëndësishëm edukues”, tha ajo. Te reforma në të gjitha institucionet e artit dhe kulturës u ndal edhe Kryeministri Rama. “Jam plotësisht i angazhuar për një reformë tërësore e rrënjësore të institucioneve, ku sot ndihen e preken ngado gjurmët e një rrënimi të papranueshëm. Sikur të mos ishit ju, njerëzit e talentuar dhe protagonizmi individual i tyre në botën e brishtë e të varfër e fare të braktisur, ku jeton krijimtaria juaj, politikat rrënuese kulturore të këtyre viteve do e kishin shkretuar mjedisin tonë të artit”, tha ai.
Rama ka falënderuar dy artistët Kerni e Shabani, që u kthyen në Shqipëri për të dhënë kontributin e tyre, duke u drejtuar edhe një apel të gjithë atyre njerëzve të suksesshëm që jetojnë jashtë vendit, që të kthehen, pasi Shqipëria ka shumë nevojë për ta. Duke shprehur besimin e tij në aftësitë e dy artistëve, Rama u shpreh se “janë të dy para përgjegjësisë së madhe të dhënies së një kontributi kyç, sigurisht mes të tjerësh dhe bashkë me të tjerë natyrisht për krijimin e një hapësirë artistike shqiptare si referencë e re, në hartën kulturore të Europës Juglindore. Koha do të provojë deri në fund vlerën e zgjedhjes së bërë nga ministrja dhe të mbështetur me shumë entuziazëm edhe nga unë, ashtu sikundër do të provojë dhe dobinë e politikave tona të reja kulturore, që po konceptohen dhe do të formësohen në dialog me komunitetin”. Rama e quajti një takim të shpejtë dhe jashtë protokollit atë të djeshmin, duke premtuar të tjera takime, ku të debatohet për çështje të rëndësishme të artit e kulturës. Të ndodhur përpara Kryeministrit, por edhe kolegëve artistë, me të cilët do të ndajnë orë të gjata pune, Ilir Kerni e Artan Shanani nuk kish si të mos ndiheshin të emocionuar. Teksa thotë se gjithnjë e kishte parë me “xhelozi” punën e bërë nga Edi Rama në Tiranë, Kerni thotë se shumë punë e pret përpara. Ndërsa Shabani, pasi falënderoi për besimin që iu dha, u shpreh se tashmë është puna që do të tregojë detyrën e tij.

NDIQE LIVE "PANORAMA TV" © Panorama.al