TIRANE- “Kurajë e shekullit të shkuar” e konsideroi kryeministri, Sali Berisha Presidentin e fundit të Bashkimit Sovjetik Mihail Gorbaçov gjatë një pritjeje në kryeministri.
Gorbaçov ndodhet në Shqipëri si i ftuar nderi në Kampionatin Botëror të Shahut për Femra, që po zhvillohet në vendin tonë.
Duke e vlerësuar si një nga personalitetet ndërkombëtare më popullore në Shqipëri, kryeministri Berisha tha se reformat e udhëhequra nga Gorbaçov hapën një epokë të re lirie, jo vetëm për popujt e Bashkimit Sovjetik, por për të gjithë Europën e botën.
“Midis nomenklaturës dhe popullit, ju zgjodhët popullin.” – theksoi kryeministri.
Nga ana e tij, Presidenti Gorbaçov duke shprehur kënaqësinë që ndodhet në Shqipëri u shpreh,“Unë jua kam pasur shqiptarëve borxh këtë vizitë dhe tani e shleva atë”.
“Ju jeni një politikan real dhe kjo është e rëndësishme për vendin”, i tha Gorbaçov kryeministrit Berisha.
Në takim ishte i pranishëm edhe Presidenti i Federatës Botërore të Shahut Kirsan Ilyumzhinov.
NDIQE LIVE "PANORAMA TV" © Panorama.al
