Washington- Kreu i Bashkisë së Tiranës, Lulzim Basha ka folur nga Washingtoni për 21 janarin, duke kërkuar vetem zbatimin e ligjit. Sipas kreut të bashkisë, procesi duhet të bazohet në ligj dhe të ecë në parametrat e shtetit ligjor.
“Mendoj se është shumë e rëndësishme që procesi të ecë në parametrat e shtetit ligjor dhe në këtë kuptim çdo aktor duhet të udhëhiqet pikërisht nga ligji dhe nga nevoja për të ekzekutuar brenda kornizës ligjore përgjegjësitë që ka”- ka thënë Basha, i pyetur për të komentuar mbi 21 janarin, kohë kur ai ishte ministër i Brendshëm.
Në vijim të vizitës së tij në SHBA, Basha takohet sot me kryetarin e Bashkisë të Washingtonit Vincent Gray. Gjatë qëndrimit në Washington, Basha ishte ftuar dje në qendrën e studimeve të avancuara ndërkombëtare SAIS, ku ai foli për vizionin e tij si kryetar i bashkisë së kryeqytetit.
Ai tha se si kryetar i qytetit më të madh e të rëndësishëm të Shqipërisë, gjithë energjia e tij do të drejtohet drejt përmirësimit të jetës së qytetarëve të saj.
Sipas tij, problemet e Tiranës janë të shumta dhe nuk mund të zgjidhen brenda 24 orësh, por ai shtoi se për zgjidhjen e tyre ai do të tërheqë mendimin e qytetarëve dhe do ta mbajë bashkinë larg politikës.
“Mendoj se kemi arritur të nxjerrim bashkinë e Tiranës nga vorbulla e konfliktit politik dhe orientimin e saj 100% tek problemet, sfidat, dëshirat dhe aspiratat e qytetarëve . Bashkia është e hapur për qytetarët jo vetëm me takimet me mua personalisht por edhe përmes kontakteve të drejtpërdrejta me njerëzit. Gjithashtu qytetarët janë të përfshirë në vendimmarrje. Asnjë vendimmarrje e rëndësishme nuk është bërë pa pjesëmarrjen e qytetarëve.”
Gjatë fushatës elektorale Basha premtoi të zgjidhte një prej problemeve më të mprehta për Tiranën, siç ishte ai i regjistrimit të banesave. Basha theksoi se hipotekimi pritet të përfundojë brenda vitit 2012.
“ Ministria e Transportit dhe e Drejtësisë janë mbështetëse të procesit të hipotekave dhe falë kësaj ne kemi arritur të avancojmë shumë mirë me një pjesë të pallateve me leje por të pahipotekuara. Me mbështetjen e tyre do të arrijmë t’a finalizojmë këtë proces brenda një kohe të shkurtër, brenda vitit 2012”- tha ai. (VOA)
NDIQE LIVE "PANORAMA TV" © Panorama.al
