Deputeti i Bundestagut, Josip Juratovic, thotë se presidenti serb Aleksandar Vuçiç ka të drejtë kur thotë se janë të mundshme pasojat për Serbinë nëse nuk pranohet propozimi për marrëveshjen Kosovë-Serbi, por, siç thekson ai, “nuk bëhet fjalë për të pranuar planin franko-gjerman, por se do të arrihet një marrëveshje – së cilës do t’i përmbahen të dyja palët”.
“Nëse njëra apo të dyja palët bllokojnë kompromisin, atëherë ekziston rreziku që të ndodhë pikërisht ajo për të cilën po flet Vuçiç”, thotë deputeti i Bundestagut.
Juratovic, për “N1” thotë se nuk i di detajet e planit franko-gjerman, por thekson se Serbia dhe Kosova duhet të gjejnë zgjidhje përmes dialogut dhe kompromisit.
Deputeti i Bundestagut kujton shembullin e dy Gjermanive, që ekziston, siç thotë ai, si temë diskutimi dhe shton se është i mendimit se kjo është një mundësi që nuk është aq e keqe as për Kosovën, as për Serbinë, duke qenë se është e vështirë për Serbinë të njohë Kosovën. “Por kjo nuk është prioritet tani, edhe dy Gjermanitë nuk e njihnin njëra-tjetrën, por ishin në institucionet ndërkombëtare dhe përmes konventave ndërkombëtare ishin të dobishme në kontekstin ndërkombëtar”, shton deputeti.
NDIQE LIVE "PANORAMA TV" © Panorama.al
