Sot është mbajtur ceremonia mortore për 14 personat e vrarë nga rrëzimi i helikopterit në Ukrainë, gjatë ditës së mërkurë.
Presidenti ukrainas, Volodymyr Zelensky, ngushëlloi i përlotur anëtarët e familjes së ministrit të Brendshëm që humbi jetën dhe tha se ndjeu një “trishtim të papërshkrueshëm”.
Ukraina ka hapur një hetim për rrëzimin – por çfarë dimë ne deri tani mbi këtë ngjarje?
Helikopteri u rrëzua pranë një çerdheje dhe një ndërtese apartamentesh në Brovary, në lindje të Kievit.
Të paktën 14 persona u vranë, duke përfshirë të 10 personat në bordin e helikopterit dhe katër të tjerë në tokë.
Të vrarët ishin:
- Ministri i Brendshëm Denys Monastyrsky
2. Zëvendësministri i parë Yevhen Yenn
3. Sekretari i Shtetit i Ministrisë së Brendshme Yuriy Lubkovych
4. Kolonel Mykhailo Pavlushko, shefi i sigurimit të zotit Monastyrsky
5. Andriy Marynchenko, oficer i lartë i policisë
6. Tetiana Shutiak, punonjëse e departamentit të shërbimit të patronazhit të ministrisë
7. Mykola Anatsky, një punonjës i departamentit të komunikimit të ministrisë
8. Komandanti i ekuipazhit të helikopterit Oleksandr Vasylenko
9. Piloti Kostiantyn Kovalenko
10. Mekanik Ivan Kasianov
11. Katër civilë, përfshirë një fëmijë, thuhet se u vranë në tokë.
Sipas burimeve nga mediat e huaja, zyrtarët po shkonin në një “pikë të nxehtë” të luftës kur helikopteri u rrëzua.
Shkaku i rrëzimit nuk dihet, megjithëse Shërbimi i Sigurisë së Ukrainës po shqyrton disa mundësi.
Ato përfshijnë shkelje të rregullave të sigurisë së fluturimit, mosfunksionim teknik të helikopterit dhe veprime të qëllimshme për shkatërrimin e mjetit.
Procesi i hetimit të ngjajes për zbulimin e shkakut të rrëzimit të helikopterit pritet të zgjasë disa javë.
NDIQE LIVE "PANORAMA TV" © Panorama.al
