Pasi shpenzoi 54 milionë paund për të transferuar mbrojtësin e djathtë të Totenhemit, Kejli Uoker, skuadra e Mançester Sitit ka zyrtarizuar sot një tjetër mbrojtës të djathtë.

Bëhet fjalë për lojtarin e Real Madridit, Danilo. Braziliani firmosi sot me “qytetarët” një kontratë 5-vjeçare, duke nisur një aventurë të re në kampionatin anglez. Klubi i Guardiolës pagoi 27 milionë paund për të transferuar 26-vjeçarin në “Etihad Stadium”.

Por çmenduria e transferimeve në skuadrën angleze nuk ka fund. Edhe pse momentalisht janë shpenzuar plot 133 milionë paund për 2 mbrojtësa dhe 1 portier, klubi nga Mançesteri është gati për një tjetër goditje në merkato.

Bëhet fjalë për mbrojtësin e majtë të Monakos, Benjamin Mendi. 52 milionë paund është oferta që Siti i ka bërë klubit francez për transferimin e 23-vjeçarit në Mançester. Mediat angleze raportojnë se kampionët e Francës, e kanë pranuar ofertën marramendëse dhe mbrojtësi pritet të transferohet shumë shpejt në Premier Ligë.

 

Në këtë mënyrë, mbrojtja që Pep Guardiola do të ketë në dispozicion do të jetë më e shtrenjta e historisë së futbollit, por ndoshta jo më e mira. Në total shpenzimet për repartin difensiv kapin shifrën e 185 milionë paund.

LISTA 

Ederson 35 milionë paund

Uoker 54 milionë paund

Danilo 27 milionë paund

Mendi 52 milionë paund

NDIQE LIVE "PANORAMA TV"

---