Kosova është përfaqësuesja më e re në Europë, pasi vetëm para dy vitesh është njohur si anëtare në FIFA dhe është lejuar që të luajë ndeshjet zyrtare. Nën drejtimin e trajnerit zviceran, Bernard Shaland, Kosova e ka mbyllur vitin 2018 pa asnjë humbje. Por, përveç kësaj, “Dardanët” kanë vendosur një rekord në ndeshjet në grupe në Ligën e Kombeve, pasi kanë sulmin më të mirë.

Në gjashtë ndeshje kosovarët kanë shënuar 15 gola, ku nëntë prej tyre i realizuan në tri ditët e fundit, pesë në portën e Maltës dhe katër ndaj Azerbajxhanit. Ndërsa, golat e pësuar janë vetëm dy, gjë e cila tregon se përfaqësuesja më e re në Europë ka arritur të formojë një skuadër të balancuar, me elementë të rinj, premtues dhe me dëshirë për të dhënë më të mirën për Kosovën.

Pas suksesit historik që arritën mbrëmë, duke siguruar kualifikimin në raundin “play-off” të Ligës D, e gjitha Kosova ka shpërthyer në një festë legjitime.

Ndërkohë për sa i përket Shqipërisë, kuqezinjtë e Kristian Panuçit arritën të shënonin vetëm 1 gol në Ligën e Kombeve.  Vetëm një skuadër ka bërë më keq në këtë edicion, San Marino e Ligës D, që nuk ka arritur të shënojë asnjë gol në portën kundërshtare në ndeshjet e veta, ndërsa ka pësuar 16 të tillë. Ndërkohë për sa i përket skuadrave që kanë shënuar vetëm 1 gol, ato janë: Islanda, Irlanda, Mali i Zi.

NDIQE LIVE "PANORAMA TV"

---