Drejtori Ekzekutiv i Frontex-it, Hans Leijtens u takua të martën në Pikën e Kakavijës me oficerët e trupave të përhershme të agjencisë të vendosur në kufirin me Greqinë dhe me Policinë Kufitare Shqiptare për të përforcuar angazhimin në mbrojtjen e të drejtave të migrantëve të parregullt.
Takimi pason nënshkrimin një ditë më parë të një marrëveshjeje mes Ministrisë së Brendshme shqiptare dhe FRONTEX-it, ku të dy palët ranë dakord të forcojnë bashkëpunimin e tyre për mbrojtjen e të drejtave themelore.
Drejtori Ekzekutiv i Frontex-it, Hans Leijtens e ka vlerësuar nëshkrimin e marrëveshjes me ministrin e Brendshëm shqiptar Bledi Çuçi si një moment historik që konfirmon angazhimin e përbashkët për të mbrojtur të drejtat themelore në të gjitha aktivitetet operacionale të FRONTEX në Shqipëri.
Marrëveshja, sipas Leijtens “është më shumë se një nënshkrim në letër, është një shprehje e prekshme e përkushtimit tonë kolektiv për të mbështetur dinjitetin dhe sigurinë e të gjithë atyre që kalojnë kufijtë evropianë,”
Marrëveshja synon të sigurojë shkëmbimin e informacionit dhe bashkëpunimin ndërmjet agjencisë europaine policore të ruajtjes së kufijve dhe autoriteteve shqiptare në lidhje me pretendimet për shkelje të të drejtave themelore në aktivitetet operacionale të Frontex-it në territorin e Shqipërisë.
Si Frontex-i ashtu edhe autoritetet shqiptare kanë mekanizma të pavarur ankesash në fuqi dhe marrëveshja ndërton një urë lidhëse mes tyre.
Frontex është përgjegjës për trajtimin e të gjitha ankesave kundër shkeljes së pretenduar të të drejtave themelore të kryera nga anëtarët e ekipeve policore gjatë operacioneve në zonat kufitare, ndërsa autoritetet shqiptare, të stafit të tyre.
Në shkurt të vitit 2022, Zyrtari për të Drejtat Themelore të Frontex, Jonas Grimheden, dhe Avokati i Popullit shqiptar nënshkruan një marrëveshje të veçantë për bashkëpunimin dhe shkëmbimin e informacionit.
Frontex-i nisi operacionin e përbashkët në Shqipëri, operacionin e parë të agjencisë në Ballkanin Perëndimor, në maj 2019. Aktualisht janë 162 oficerë evropianë të rojeve kufitare që punojnë së bashku me Policinë Kufitare Shqiptare.
Objektivi kryesor i operacioni të përbashkët është administrimi efektiv i migracionit, lufta kundër formave të ndryshme të krimit ndërkufitar si trafikimi i qenieve njerëzore, kontrabanda e migrantëve dhe terrorizmi, dhe forcimi i përpjekjeve bashkëpunuese në kufirin e përbashkët tokësor midis Shqipërisë dhe Greqisë. /VOA
NDIQE LIVE "PANORAMA TV" © Panorama.al
