Presidentja e Kosovës, Vjosa Osmani ka thënë sulmi terrorist në veri lidhet me liderët serbë. Në një intervistë për CNN, ajo u shpreh se në ditët në vijim do të publikohen dëshmi të reja që tregojnë se presidenti serb Aleksandar Vuçiç qëndron prapa kësaj dhe ka dhënë urdhra.
Presidentja tha se nuk ka konfirmim se ushtria serbe është larguar nga kufiri me Kosovën. “Këtë informacion nuk e kanë konfirmuar aleatet tanë ndërkombëtar”, ka thënë Osmani në një intervistë për CNN.
Ajo ka thënë se “akti i agresionit ishte planifikuar shumë mirë, sikurse ai i vitit 2014 në Crime”.
“Fillimisht ata ndërtuan baza ushtarake në linjën prej 400 kilometrash dhe dëshironin që të ketë në fillim tensione në veri dhe me pas sulmi. Kjo do t’i ndihmonte Vladimir Putinit të hapte një front të ri të luftës. Kjo ishte sikurse ajo koha e Slobodan Milosheviçit gjatë viteve 90-ta”, tha ajo.
Osmani tha se çdo evidencë që kanë nga ky sulm lidhet me liderët e shtetit serb.
“Ka pasur video të qarta se si grupi i Radoiçiçit ushtrohet në shtetin serb. Gjithashtu edhe armët që i kemi kapur, ato nuk janë të njerëzve të rëndomtë. Lidhjen e Radoiçiç me Vuçiçin e shohim edhe në takime të ndryshme kur ata shihen bashkë”, tha ajo.
“Në ditët në vijim do të publikojmë dëshmi të reja që tregojnë se Vuçiç është pas kësaj dhe ka dhënë urdhra. Në fillim kishte një kampanjë të fuqishme të agresionit para se sulmi të ndodh”, tha Osmani.
Po ashtu Osmanin deklaroi se “është shumë me rëndësi që të sanksionohet e dënohet Serbia për veprimet e saj nga faktori ndërkombëtar. Çdo dëshmi tregon lidhjen direkte të shtetit serb me atë që ndodhi në veri të vendit. Armët që janë gjetur përdoren nga ushtria dhe shteti serb, e jo nga qytetarët serbë. Vuçiçi do të vazhdojë ta përdorë narrativën e Millosheviçit”.
NDIQE LIVE "PANORAMA TV" © Panorama.al
