NGA QEMAL ÇEJKU
Ka apo nuk ka provime Matura Shtetërore sivjet?!
Nuk shikoj asnjë konsultim apo “korrigjim” strategjie për të kuruar pasojat e pandemisë.
Mirë ministresha jomësuese, e cila po i bën qokë partisë, me anëtarësime të reja, apo agjendën ndërkombëtare të kryeministrit, por gjithë listën e gjatë të institucioneve përgjegjëse të maturës i ka pllakosur heshtja. Mos ndoshta kanë mbaruar provimet, sepse shihen faqe interneti që postojnë universitete jopublike. Apo iu është dhënë teza si detyrë shtëpie?
P.s Më vjen mirë të jem i gabuar unë, të dashur maturantë.
Sipas udhëzimit 661/datë 01 janar 2023, “Për miratimin e rregullores për zhvillimin e Maturës Shtetërore”, Neni 4 cilëson institucionet dhe strukturat përgjegjëse për këtë proces.
Institucionet dhe strukturat përgjegjëse për organizimin dhe zhvillimin e provimeve të Maturës Shtetërore janë:
1. Ministria e Arsimit dhe Sportit.
2. Komiteti i Maturës Shtetërore.
3. Qendra e Shërbimeve Arsimore.
4. Agjencia e Sigurimit të Cilësisë në Arsimin Parauniversitar
5. Drejtoria e Përgjithshme e Arsimit Parauniversitar.
6. Drejtoria Rajonale e Arsimit Parauniversitar.
7. Zyra Vendore e Arsimit Parauniversitar.
8. Komisioni i Maturës Shtetërore nëZVAP.
9. Komisioni Shkollor i Maturës Shtetërore.
10. Agjencia Kombëtare e Arsimit, Formimit Profesional dhe Kualifikimeve.
11. Institucionet e arsimit të mesëm të lartë. Po të hapim faqet zyrtare të këtyre institucioneve shihet vetëm shpërndarja masive e aktiviteteve politike apo tallavatë e zonjës që akoma mendon se është duke drejtuar QSUT.
Është kthyer arsimi si një spital i stërmadh me pacientë që kanë nevojë për ndihmën e parë zonja jomësuese.
Ndërkohë ky duhej të ishte një vit shkollor, ku të shikohej seriozisht rënia e numrit të të diplomuarve në ciklin bachelor; vetëm për 2023 numri i diplomave u tkurr me 14% sipas INSTAT.
Zonja ministre me siguri as ia ka idenë se tkurrja më e madhe në numrin e të diplomuarve ka ndodhur pikërisht në degët që lidhen me përgatitjen e mësuesve të ardhshëm; vetëm 341 diploma në degët e arsimit nga 1613 të tilla që u dhanë në vitin 2015 me rënie 79%.
Duket që strategjia për të mbështetur këto degë ka dështuar me sukses si shumë nisma të tjera para saj. Shumë shpejt mësuesit e matematikës, fizikës, etj. nuk do të mund të gjenden as në bashkitë kryesore si Tirana e Durrësi sepse në rrethe të tjera ka kohë që mungojnë.
Këto dështime do të duhej t’ia prishnin gjumin dhe ëndrrat elektorale zonjës ministre, por mesa duket nuk po ndodh e nuk ka për të ndodhur!
NDIQE LIVE "PANORAMA TV" © Panorama.al