Motra e liderit të Koresë së Veriut, Kim Jong Un, ka akuzuar Ukrainën se po kërkon armë bërthamore.
Sipas mediave shtetërore, Kim Yo Jong tha se një peticion pro-bërthamor ukrainas, i cili ka marrë vetëm 611 nënshkrime, ishte një komplot politik nga zyra e Volodymyr Zelensky-t, raportoi KCNA.
Zonja Kim, vetë një zyrtare e lartë e Koresë së Veriut, nuk dha asnjë provë për pohimin, i cili duket se bazohet vetëm në një peticion publik të paraqitur në faqen e internetit të zyrës presidenciale të Ukrainës të enjten.
Peticioni pasoi një njoftim nga Vladimir Putin se Rusia planifikon të vendosë armë taktike bërthamore në Bjellorusinë fqinje.
Zyrtarët e Kievit nuk e kanë komentuar peticionin deri më tani.
Koreja e Veriut ka krijuar lidhje më të ngushta me Kremlinin dhe ka mbështetur aneksimin e shpallur nga Moska të pjesëve të Ukrainës që ajo pushtoi vitin e kaluar.
Kujtojmë se Ukraina hoqi dorë nga armët e saj bërthamore në vitet 1990, pasi i trashëgoi ato pas rënies së Bashkimit Sovjetik. Në këmbim, fuqitë botërore, përfshirë Rusinë, premtuan se nuk do të cenonin sigurinë e saj.
Një këshilltar për politikën e jashtme të zëvendës-kryeministrit ukrainas tha se ky ishte “një gabim” në mars të vitit të kaluar, duke sugjeruar se Rusia nuk do të kishte pushtuar kurrë vendin nëse Ukraina do të kishte mbajtur aftësitë e saj bërthamore.
Kush është Kim Yo Jong?
Titulli zyrtar i zonjës Kim është zëvendës-drejtoresha e departamentit të Komitetit Qendror të Partisë së Punëtorëve në pushtet, por agjencia e spiunazhit të Koresë së Jugut ka thënë se ajo merret me marrëdhëniet me Korenë e Jugut dhe SHBA.
Gjithashtu është bërë e ditur se ajo është personi i dytë më i fuqishëm i Koresë së Veriut pas vëllait të saj.
NDIQE LIVE "PANORAMA TV" © Panorama.al
