Dobësimi i sistemit imunitar tashmë sipas një studimi të kryer nga Instituti i Psikiatrisë, Psikologjisë dhe Neuroshkencës (IoPPN) në King’s College në Londër, ka treguar se ndikohet shumë edhe nga depresioni.
Hulumtimet u fokusuan kryesisht në vlerësimin e niveleve të proteinës C-reaktive, një nga proteinat e lidhura me inflamacionin.
Megjithatë, nivelet e kësaj proteine nuk japin pamjen e plotë të përgjigjes imune, dhe studimi ka marrë në shqyrtim elementë më të gjerë të imunitetit, që nuk janë kapur nga nivelet e proteinës C-reaktive.
Studiuesit vlerësuan 168 pjesëmarrës, nga të cilët 128 ishin diagnostikuar me depresion. Ata i ndanë pjesëmarrësit në tre nëngrupe sipas niveleve të proteinës C-reaktive të regjistruara në gjakun e tyre.
Studiuesit analizuan shprehjen e 16 gjeneve të përfshira në përgjigjen imune dhe që ndikojnë në sjelljen njerëzore. Studiuesit zbuluan se pjesëmarrësit me depresion të diagnostikuar kishin rritje të shprehjes së këtyre gjeneve, krahasuar me ata që nuk ishin në depresion.
Në një hap të dytë, studiuesit krahasuan shprehjen e këtyre 16 gjeneve midis pacientëve në depresion me nivele të ngritura dhe jo të ngritura të proteinës C-reaktive (CRP), duke vërejtur se nuk kishte dallime të rëndësishme. Ky zbulim sugjeron se kjo shprehje e gjenit ishte e pavarur nga nivelet e proteinave dhe potencialisht nënvizonte një mekanizëm të ndryshëm.
Studiuesit më pas kryen një analizë dytësore te pjesëmarrësit, nivelet e proteinës C-reaktive të të cilëve ishin më pak se një njësi, duke zbuluar se edhe këta pacientë kishin ende shprehje dukshëm më të lartë të gjeneve të sistemit imunitar në krahasim me ata që nuk vuanin nga depresioni.
Duke komentuar rezultatet, Carmine Pariante, profesoreshë e Psikiatrisë Biologjike në King’s IoPPN dhe autori kryesor i studimit, tha se studimi tregoi se ekziston një përgjigje imune në gjenet e individëve në depresion, pavarësisht nga nivelet e proteinave.
Sipas studiueses, kjo do të thotë se sistemi imunitar aktivizohet te shumë më tepër pacientë me depresion.
“Këto gjetje të rëndësishme do të na lejojnë të identifikojmë rrugët molekulare të përfshira në depresion, dhe llojet e ndryshme të përgjigjeve imune që mund të hapin rrugën për qasje më të personalizuara ndaj trajtimit”, tha studiuesja.
Ndërkohë edhe Dr. Luca Sforzini, autori i parë i studimit nga King’s IoPPN tha se “pacientët me depresion me ndryshime imune kanë më pak gjasa t’i përgjigjen antidepresantëve standardë”.
NDIQE LIVE "PANORAMA TV" © Panorama.al
