Muaji gusht ka shënuar një rritje të ndjeshme të depozitave në sistemin bankar. Ky është një efekt sezonal ky që ndodh gjithnjë, për shkak të ardhjes së emigrantëve për pushimet e verës, por këtë muaj kanë ndikuar dhe korporatat e tjera jo financiare.
Sipas të dhënave të Bankës së Shqipërisë në fund të muajit gusht stoku i depozitave në vend u rrit me 1.95, ose 24 miliardë lekë më shumë në krahasim me muajin e mëparshëm. Kjo është rritja më e madhe mujore që prej dhjetorit të vitit 2020.
I gjithë zgjerimi i kursimeve në sistemin bankar ka ardhur nga euro. Depozitat në valutë u rritën me 3.8% në krahasim me muajin e mëparshëm, të ndikuara në pjesën më të madhe nga korporatat jo financiare, kursimet pa afat të të cilave u shtuan me gati 8%. Ndërsa kursimet pa afat të individëve në valutë u zgjeruan me 3.6%. rritja e depozitave në valutë është më e lartë për shkak se të dhënat raportohen në lekë dhe shifra rezulton më e ulët për shkak të zhvlerësimit të ndjeshëm të euros këtë vit.
Në të kundërt, kursimet në lekë kanë shënuar rënie me 0.5% në raport me muajin e mëparshëm, duke reflektuar vështirësitë në kursimin në monedhën vendase pas rritjes së ndjeshme të çmimeve në krahasim me të ardhurat.
Me bazë vjetore (gusht 2022/gusht 2021), depozitat në total janë rritur me 7.5%, të ndikuara në pjesën më të madhe nga valuta (+11.6%) dhe më pak nga monedha vendase (+2.4%).
Gjatë dy viteve të fundit, kursimet janë rritur të orientuara nga valuta, ndryshe nga viti pandemik kur u zgjeruan depozitat në lekë për shkak të pamundësisë për të shpenzuar.
Ndërsa vitin e fundit kursimi në lekë po bëhet më i vështirë, pasi familjet duhet të shpenzojnë më shumë për të ushqyer, teksa inflacioni në gusht arriti në 8%, nivelet më të larta që nga koha e piramidave.
Në fund të gushtit, pesha e kursimeve në valutë ishte 57.2%, nga 55.2% në të njëjtën periudhë të një viti më parë./Monitor
