Kryeministri i Spanjës, Pedro Sánchez pritet që të hënën të marrë një vendim nëse do të japë apo jo dorëheqjen, pasi bashkëshortja e tij akuzohet për korrupsion.
Sipas The Guardian, Sánchez është duke reflektuar për të ardhmen e tij.
“Tani që kemi arritur në këtë pikë, pyetja që në mënyrë mjaft legjitime i bëj vetes është: a ia vlen e gjithë kjo? Sinqerisht nuk e di”, shkruan kryeministri në letrën e tij. “Më duhet të ndalem dhe të mendoj për të.”
Sánchez këmbënguli në pafajësinë e gruas së tij dhe akuzoi hapur partinë konservatore Popullore (PP) dhe partinë e ekstremit të djathtë Vox për bashkëpunim me Manos Limpias dhe pjesë armiqësore të medias në një përpjekje për të sjellë “kolapsin e tij personal dhe politik” duke sulmuar gruan.
Letra e Sánchez – të cilën ai mendohet se e ka shkruar vetë dhe pa u konsultuar me këshilltarët e tij – është përshkruar nga aleatët e tij si personale nga një burrë i sëmurë nga sulmet ndaj gruas së tij, të cilat janë përshkallëzuar gjatë viteve të fundit.
“Ne shpesh harrojmë se ka njerëz pas politikanëve,” shkroi kryeministri. “Nuk jam i turpëruar të them se jam një burrë që është thellësisht i dashuruar me gruan e tij dhe që duhet të jetojë me pafuqinë për të parë gjithë baltën që i hidhet asaj çdo ditë.”
NDIQE LIVE "PANORAMA TV" © Panorama.al
