Tirana la të lirë Erion Hoxhallarin që të luajë me Laçin në Europë, megjithatë jo më larg se një javë më parë “bllokoi” huazimin e Albi Dokës. Lojtari i linjës së djathtë u kërkua prej Kukësit, por drejtuesit refuzuan. Shkaku: kanë planifikuar që ta shesin në merkaton e janarit.

Për mbrojtësin e talentuar, i cili mjaft mirë mund të përshtatet fare mirë edhe si mesfushor, kjo do të ishte një mundësi e artë për t’u promovuar në arenën europiane. Por, frika e ndonjë dëmtimi të mundshëm dhe mbi të gjitha “djegia” e mundësisë së transferimit në dimër, stepi kryeqytetasit.

Tirana pretendon që të gjenerojë parà me këtë element, madje i kanë vendosur edhe një çmim kartonit të tij, që shkon në 300 mijë euro. Kujtojmë që verën e kaluar, por edhe në janar, ai pati disa oferta të mira, por klubi kurrë nuk mori atë që kërkonte. Një ndër to ishte edhe ajo e Skënderbeut, që ishte gati të jepte afro 150 mijë euro për shërbimet e 21-vjeçarit, por Tirana nuk u tundua me këtë shifër.

Për të mos e rrezikuar, lojtari nuk shkoi as me Shpresat. Kujtojmë që në fund të sezonit të kaluar, të riun nuk e ndoqi fati. Doka që pas fazës përgatitore të janarit ka qenë më së shumti i dëmtuar, e në kësi kushtesh bardheblutë, periudhën e parë të kampionatit në elitë, do ta shfrytëzojnë për rehabilitimin e plotë. Vetëm kështu talenti i Tiranës do të kthehet në top-formë dhe do të jetë gati për t’u shitur në merkaton e dimrit.

 

NDIQE LIVE "PANORAMA TV"

---