Stadiumi i Peshkopisë mbetet i mbyllur, Korabi luan në Elbasan
Federata Shqiptare e Futbollit e ka cilësuar si jashtë standardeve stadiumin e qytetit të Peshkopisë për sa i përket ndeshjes së parë të fazës së tretë të Kategorisë Superiore, që Korabi luan të shtunën kundër Laçit.
Sipas njoftimit të vetë klubit dibran, shpjegohet se gjendja e terrenit për shkak të ngricave të kohëve të fundit, është e papërshtatshme. Ndaj FSHF ka vendosur që edhe për këtë javë të mos luhet në qytetin e Peshkopisë, duke zhvendosur këtë ndeshje në stadiumin “Elbasan Arena”, ndërsa pritet që në një inspektim të mëvonshëm të vendoset zyrtarisht për kthimin e skuadrës në qytetin e saj.
“ZYRTARE, Korabi-Laçi, e shtunë, data 28/01/2017, stadiumi “Elbasan Arena”, ora 14:00.
Është vendosur përfundimisht që ndeshja Korabi-Laçi të luhet në stadiumin “Elbasan Arena”. Komisioni i Licencimit pranë FSHF-së inspektoi sot stadiumin e Peshkopisë dhe u vendos që takimi i parë i fazës së tretë ndërmjet Korabit dhe Laçit të zhvillohet në impiantin e Elbasanit.
Kushtet e vështira atmosferike kanë bërë që tapeti i stadiumit të saporikonstruktuar të mos jetë në gjendje optimale. Korabi fton të gjithë tifozët të përkrahin skuadrën për të arritur fitoren e parë për fazën e tretë të kampionatit”, shkruhej në njoftimin e klubit dibran, vendim i cili u konfirmuar më pas edhe nga FSHF.
NDIQE LIVE "PANORAMA TV"