“Frikë” nga Laçi, Luftëtari do kthesën në javën e dytë
Luftëtari u ka dhënë dje fund përgatitjeve dhe është gati për të sfiduar Laçin. Me seancën e zhvilluar paradite në fushën sportive “Lefter Millo”, bluzinjtë kanë marrë porositë e fundit para këtij dueli. Klubi kërkon me çdo kusht kthesën dhe për këtë motiv ka vendosur heshtje.
Askush nuk doli para mediave dje, ndërsa drejtuesit menduan që është më mirë që trajneri dhe lojtarët të flasim në fushën e lojës. Humbja në start i ka bërë me “hije” gjirokastritët, duke dëshmuar një lloj frike përballë kurbinasve, të cilët dallohen për forcën që kanë në Laç.
Por, nuk janë të të njëjtit opsion një pjesë e mirë e futbollistëve bluzinj, të cilët dy-tri ditë më parë janë shprehur se këtë javë do të vijë kthesa e shumëpritur. Dhe këtë e kanë shfaqur edhe në seancat stërvitore, ku është parë dëshira, grinta dhe përqendrimi i tyre për të korrigjuar dobësitë e konstatuara. Vendosjet të lojtarëve në zona të ngushta, mbrojtje përballë sulmit dhe goditje standarde nga pozicione të ndryshme, ishin në fokusin e stafit teknik dje në Derviçan.
Formacioni i gjirokastritëve nuk ndryshon. Edhe kurbinasit do ta sfidojnë me të njëjtët titullarë si ndaj Kastriotit, pjesë e lojtarëve që udhëtuan në orën 16:30 drejt Laçit. Edhe pse takimin do ta luajnë në transfertë, nga sa mësohet, trajneri Kostiç u ka kërkuar të tijve përqendrim në finalizim dhe në këtë formë paralajmërohet që në fushë do të zbresë një ekip me detyra sulmuese. Këtë plan kishin edhe me krutanët, e megjithatë në start llogaritë “ngecën”. Mendohet se në krah të ekipit do të jenë edhe tifozët.
Tomor Shehu
NDIQE LIVE "PANORAMA TV"