Lushnja nuk ka në plan që të ndalet në merkato. Shton sërish forcat në sulm, por këtë herë “pazarin” e ka përqendruar te Korabi. Ka marrë Erjon Dragonin, pogradecari që luan në linjën e majtë të ofensivës. Kërkonte diçka ndryshe pas përfundimit të pjesës së parë të sezonit dhe verdhejeshilët ishin opsioni më i mirë. Këtë e thotë vet 24- vjeçari, gjatë deklaratës së dhënë enkas për “Panorama Sport”:

“Kam firmosur dhe zyrtarisht jam lojtar i Lushnjës. Unë vetë kisha dëshirë të bëja diçka ndryshe. Gola me drejtuesit e Korabit për të lëvizur. Ramë dakord, që mund të lëvizja pa problem. Me çka më ofroi Lushnja mu duk opsioni më i mirë. E kam firmosur kontratën deri në fund të sezonit duke lënë hapësira bashkëpunimi për të ardhmen. Lushnjën e njoh dhe kam shumë shok aty. Më përshtatet dhe besoj shumë se do të bëj një kampionat shumë të mirë për pjesën e mbetur të sezonit”.

NDESHJA

Lushnja dhe Flamurtari barazuan 1-1 në një miqësore, të luajtur në stadiumin “Roza Haxhiu”. Të parët që kaluan në avantazh ishin verdhejeshilët me anë të mbrojtësit Roland Disha, në minutën e 20-të. Vlonjatët barazuan në minutën e 74-ët, me sulmuesin Estefano. Një miqësore që u zhvillua në prani të rreth 300 shikuesve, të pozicionuar në tribunën qendrore. Pjesa e parë ka qenë më e mirë për skuadrën e Gugash Maganit. Në formacionin ishte përfshirë titullar një nga afrimet e janarit, mesfushori Henri Sulovari. Në minutën e 20-të, fieraku me një krosim të përpiktë në zonë ka shërbyer për Dishën, që devijon saktë me kokë dhe shënon për 1-0. Vendësit kishin mundësi të thellonin rezultatin, por pas një gjuajtje kros e Sulovarit, topin e ndali shtylla. Një tjetër mundësi ishte dhe për francezin Lëru, që i vetëm përballë portierit Teqja nuk shënoi. Në pjesën e dytë, skuadrat ndryshuan pas zëvendësimeve të shumta. Te Lushnja aktivizohet edhe sulmuesi i afruar këtë janar nga Bregu i Fildishtë, Ibrahim Romeo Olola. Loja është e gjallë dhe nuk munguan përpjekjet dhe dëshira për të shënuar. Në minutën e 74-ët, Flamurtari barazon rezultatin. Pas një krosimi nga e majta, Estefano i futur në pjesën e dytë devijon topin me kokë dhe e përcjell në rrjetë. Në minutat e mbetura asgjë nuk ndryshon dhe Lushnja-Flamurtari mbyllet pa fitues.

Trajneri Magani: Jemi ndryshe, grupi po plotësohet

Gugash Maganit i ka shërbyer shumë kjo miqësore dhe për 1001 arsye. Nuk zgjodhi pa shkak Flamurtarin dhe këtë e shpjegon gjatë deklaratës së dhënë pas ndeshjes Për “Panorama Sport”: “Ne ndeshjen e parë të 2024-ës e luajmë në shtëpi, ndaj menduam që të provojmë veten me Flamurtarin. Nuk është ekip do si do, por pretendent për ngjitjen. Ishte zgjedhja e duhur. Ne vijmë nga ngarkesat, ndaj këmbët e disa lojtarëve ishin të rënda. Prandaj bëmë ato zëvendësimet dhe nuk i futëm të gjithë lojtarët.

Për hir të së vërtetës, pozitive është që nuk kemi dëmtime. E rëndësishme është që skuadra në pjesën e parë, sa ishte grupi kryesor, zgjidhi situata dhe luajti mirë. Patëm ekuilibra dhe raste. Edhe mund të ishim ndëshkuar, por edhe mund ta kishim thelluar. Pjesa e dytë ka qenë jo si e para. U futën lojtarë të tjerë që pretendojnë të luajnë, por normalisht nuk bëjnë diferencën. Mendoj që ne po punojmë me një standard. Marshi i gabimit tonë në përzgjedhje është shumë i vogël. Na munguan në këtë test Canka, Magani dhe Dragoj. Mungoi edhe braziliani që ka firmosur me ne, ndërsa Kananajn nuk donim ta rrezikonim. Me këta të pestë, grupi është i plotë. Me këtë nivel që kemi, do të jemi shumë më ndryshe se sa në fazën e parë”.

Trajneri resuli: Duam pak kohë, muskuj të ngarkuar

Dritan Resuli vlerëson paraqitjen e të tijve në këtë miqësore, ndonëse mendon se u duhet ende pak kohë që të futen në ritëm. “Gjatë këtyre ditëve, ekipi ka vrapuar shumë. Seancat kanë qenë shumë të ngarkuara. E zgjodhëm ta luanim në Lushnjë, që t’i përshtatemi sa më shumë para rinisjes së garës tjetër. Në përgjithësi jam i kënaqur, duke përjashtuar disa problematika të vogla. Them që na vlejti shumë për t’i dhënë përgatitjeve atë rifiniturën përfundimtare për javën e 17-të.

Ndryshuam edhe modul. Pamë disa situata. Shpeshherë ishim afër golit, patëm disa problematika te pjesa e sulmit që mbeten për t’i përmirësuar. Ndeshjet testuese gjithmonë janë të mira. Muskujt janë të ngarkuar. Kanë qenë rreth 10-12 ditë, që kanë punuar me ngarkesa të larta. Ka kohë akoma për t’u futur në ritëm. Në përgjithësi jam i kënaqur, por kjo nuk duhet të dalë nga goja ime sepse kërkojmë akoma shumë e më shumë”, tha trajneri i Flamurtarit.

ALBAN ALUSHI -PANORAMASPORT.AL

NDIQE LIVE "PANORAMA TV"

---