Shkodra po përgatitet për një ndeshje vendimtare në gjysmëfinalen e Kupës së Shqipërisë, ku Vllaznia do të presë Dinamon në stadiumin “Loro Boriçi” pas barazimit 1-1 në duelin e parë.

Trajneri Edi Martini ka konfirmuar se do të përpiqet të hedhë në fushë formacionin më të mirë të mundshëm, duke synuar kualifikimin në finale dhe një rrugëtim të gjatë drejt trofeut. Ndryshimi i vetëm në krahasim me formacionin titullar të zakonshëm pritet të vijë në portë. Portieri i kupës, Jukaj, do të zëvendësojë Pohls, duke marrë përgjegjësinë për të mbrojtur rrjetën në këtë duel të rëndësishëm.

Në mbrojtje, pritet të rreshtohen Çelikoviç, Gjini dhe Bajrami, duke siguruar një linjë solide që synon të ndalojë sulmet e Dinamos dhe të krijojë baza për kundërsulm. Në mesfushë, Edi Martini duket se po rikthehet tek zgjidhjet e provuara. Mala rikthehet në krahun e djathtë pas pezullimit në kampionat, ndërsa Jago do të mbulojë krahun e majtë. Reparti i mesfushës do të kompletohet nga Krymi, Kallaku dhe Sala, me këtë të fundit që duket se do të ketë një sfidë të fortë balotazh me Qaton për të fituar vendin titullar.

Në sulm, trajneri i kuqebluve do të mbështetet tek dyshja Balaj– Dodaj. Balaj, si sulmuesi kryesor, do të kërkojë të shfrytëzojë çdo mundësi për gol, ndërsa Dodaj do të sigurojë mbështetje dhe lëvizshmëri për të krijuar hapësira. Ky formacion synon jo vetëm të shënojë por edhe të menaxhojë lojën në momente kritike, duke ruajtur rezultat që do të çonte Vllazninë në finale. Për tifozët shkodranë, pritshmëritë janë të larta. Pas një barazimi në transfertë, çdo gol në “Loro Boriçi” mund të jetë vendimtar. Edi Martini duket i vendosur të përdorë strategjinë e duhur dhe lojtarët më të besuar për të kapërcyer këtë fazë dhe për të vazhduar ëndrrën e Kupës së Shqipërisë, duke sjellë emocione të forta për publikun vendas.

Blutë me mungesa, Daja bën ndryshime

Dinamo do të përballet me Vllazninë sot në Shkodër në kuadër të gjysmëfinales së Kupës së Shqipërisë. Dy skuadrat do të tentojnë të kalojnë në finalen e madhe, aty ku tashmë i pret Egnatia. Daja do të duhet të bëjë me mungesa edhe në këtë takim, ku Berisha, Guindo e Lorran kanë mbetur sërish jashtë skuadrës. Në pikëpyetje është edhe Neziri pasi ka pasur një problem me kaviljen dhe megjithëse është kthyer, nuk është në 100% e tij. Kështu, në portë pritet të jetë Teqja, i ndihmuar në mbrojtje nga Dita e Teikseira në qendër, ndërkohë që në të djathtë pritet të ketë vend për Nanin. Në të majtë të mbrojtjes, me shumë gjasa do të jetë Aliji, edhe pse nuk është në 100%-shin e tij. ndërkohë që në mesfushë, mund të ketë vend për Qardakun, Beqjën dhe Vilën, me Malomon e Bregun më të avancuar për të ndihmuar Ibrahim Mustafan në qendër të sulmit.

PANORAMASPORT.AL

---