Tsotne Patsatsia bëhet çështje te Tirana. Që në prag të sfidës me Flamurtarin lojtari nuk është paraqitur në skuadër.Burime në klub bëjnë me dije se lojtari dhe drejtuesit kanë nisur një “luftë të ftohtë” që pritet të kulmojë me largimin e lojtarit. Tirana po përballet me një moment të vështirë brenda skuadrës, ndërsa sfida e radhës ndaj Egnatias afrohet. Problemet kanë dalë në pah përmes mungesave të disa futbollistëve kyç në stërvitje dhe tensioneve të hapura mes lojtarëve dhe drejtuesve. Më e dukshme është situata me Tsotne Patsatsia, mesfushorin e avancuar që nuk është paraqitur në skuadër për ndeshjen me Flamurtarin.

Burime të brendshme bëjnë me dije se mes lojtarit dhe drejtuesve ka nisur një “luftë e ftohtë”, që mund të kulmojë me largimin e tij nga klubi. Patsatsia nuk ishte as në stol në sfidën e fundit dhe drejtuesit e kanë urdhëruar të luajë tek ekipi B i Tiranës. Megjithatë, mesfushori ka refuzuar dhe që nga ajo ditë nuk është paraqitur në stërvitje, duke treguar qartë një përplasje mes palëve. Ky konflikt, sipas burimeve, mund të shkojë deri në përplasje ligjore në rast se nuk gjendet një zgjidhje.

SOLER- Situata nuk ndalet këtu. Ian Soler, një tjetër lojtar i rëndësishëm, nuk ka marrë pjesë në stërvitjet e ditëve të fundit. Zyrtarisht mungesa e tij lidhet me probleme shëndetësore, por burimet nga klubi sugjerojnë se edhe e ardhmja e spanjollit me Tiranën nuk duket e sigurt. Soler, si një element me përvojë, ishte menduar të kishte rol aktiv në ekip, por largimi i tij i mundshëm tregon për sfidat që klubi po përjeton në menaxhimin e marrëdhënieve me futbollistët.

KAPITENI – Mahamadu Dembele është një tjetër pikë shqetësimi për trajnerin bardheblu. Futbollisti nuk ka qenë pjesë e stërvitjes së djeshme për shkak të problemeve fizike dhe rrezikon të mos jetë i gatshëm për ndeshjen me Egnatian. Kapiteni i skuadrës bardheblu po del jashtë planeve dhe paraqitja e tij në ndeshjet e fundit ka qenë shpesh problematike për ekipin, duke e bërë mungesën e tij një pengesë të konsiderueshme për formacionin titullar. Në sfondin e këtyre mungesave dhe tensioneve, trajneri dhe drejtuesit e Tiranës përballen me një detyrë të vështirë.

Të gjejnë mënyrën për të stabilizuar skuadrën, për të ruajtur moralin e grupit dhe për të përgatitur lojtarët për sfidën e radhës. Sfida me Egnatian nuk është thjesht një test për performancën në fushë, por edhe për aftësinë e klubit për të menaxhuar tensionet brenda skuadrës dhe për të ruajtur harmoninë e grupit. Në ditët në vijim, stërvitjet do të jenë vendimtare për të kuptuar nëse lojtarët do të kthehen në formacion ose nëse konflikte si ai me Patsatsia do të përshkallëzohen deri në ndarje përfundimtare. Tirana ndodhet para një momenti të vështirë, ku rezultati i ndeshjes dhe gjendja e brendshme e skuadrës janë të ndërlidhura ngushtë.OLSI AVDIAJ-PANORAMASPORT.AL

---