Shkëndija e Tetovës ka vendosur që t’i besojë drejtimin e ekipit një emri shumë të njohur të klubit. Artim Pollozhani është emëruar shef i stafit teknik të ekipit që do të ketë për detyrë të drejtojë skuadrën që nga ndeshjet në Europë.

Pollozhani provoi rolin e trajnerit te Ballkani e Flamurtari, ndërsa te Shkëndija e Tetovës si një prej pjesëtarëve të stafit është afruar edhe Kushtrim Voka, video-analisti i cili pak kohë më parë u largua nga Partizani.

NJOFTIMI I SHKËNDIJËS SË TETOVËS

KF Shkëndija me kënaqësi komunikon kompletimin e stafit teknik që do të udhëheqë skuadrën në sezonin e ri garues, me synime të qarta për sukses në skenën vendore dhe paraqitje sa më dinjitoze në garat europiane.

Besimi për të drejtuar ekipin i është dhënë ish-kapitenit tonë, Artim Pollozhani, i cili emërohet shef i stafit teknik të KF Shkëndija.

Një emër i njohur për familjen kuqezi, Pollozhani në disa periudha ka mbrojtur ngjyrat e Shkëndijës si futbollist, duke mbajtur edhe shiritin e kapitenit. Pas përfundimit të karrierës si lojtar, ai ka vazhduar angazhimin në futboll në role të ndryshme teknike dhe drejtuese, duke fituar përvojë si ndihmës trajner, trajner i parë dhe drejtor sportiv.

Bekim Osmani do të jetë ndihmës trajner i Pollozhanit, ndërsa stafi teknik përforcohet me asistentin dhe video-analistin, Kushtrim Voka. Saladin Mustafi vazhdon detyrën si trajner i portierëve, ndërsa Saimir Fetahi mbetet përgjegjës për përgatitjen kondicionale të ekipit.

Stafi i ri teknik i KF Shkëndija:

Artim Pollozhani – Shef i stafit teknik

Bekim Osmani – Ndihmës trajner

Kushtrim Voka – Ndihmës trajner dhe video-analist

Saladin Mustafi – Trajner i portierëve

Saimir Fetai – Trajner kondicional

Me këtë përbërje, Shkëndija vazhdon përgatitjet për sfidat që e presin në sezonin e ri, me fokus në ndërtimin e një skuadre konkurruese dhe realizimin e objektivave të vendosura. Skuadra sonte udhëton drejt Sllovenisë, për fazën përgatitore.

KF Shkëndija i uron Artim Pollozhanit dhe gjithë stafit teknik shumë suksese në drejtimin e skuadrës kuqezi.

PANORAMASPORT.AL

---